ഖുർആൻ ആസ്വാദനം
രണ്ടാം അദ്ധ്യായം
സൂറത്തുൽ ബഖറ
അമ്പത്തിയൊന്ന്, അമ്പത്തിരണ്ട് ആയത്തുകൾ
51. മൂസാക്ക് നാം നാല്പത് രാത്രികൾ നിശ്ചയിച്ച സന്ദർഭവും; എന്നിട്ടും അതിന് ശേഷം നിങ്ങൾ ഒരു കാളക്കുട്ടിയെ സ്വീകരിച്ചു; നിങ്ങൾ അക്രമികളുമായിത്തീർന്നു.
52. പിന്നീട്, അതിന്ന് ശേഷം നാം നിങ്ങൾക്ക് പൊറുത്തുതന്നു; നിങ്ങൾ നന്ദി ചെയ്യുന്നവരാവുന്നതിനായി.
മൂസാ നബിക്ക് അല്ലാഹു നിശ്ചയിച്ച നാല്പത് രാത്രികൾ; ബൈബിളിന്റെ വിവരണത്തിൽ നാല്പത് രാപകലുകൾ; അല്ലാഹു ഇസ്രാഈല്യർക്ക് നൽകിയ മഹാഅനുഗ്രഹങ്ങളിലൊന്നായിരുന്നു തൗറാത്തിലെ നിയമങ്ങൾ നേർക്ക് നേരെ എഴുതി നൽകാൻ വേണ്ടി പടച്ചവൻ നിശ്ചയിച്ച ദിവസങ്ങൾ. ബൈബിൾ പഴയനിയമത്തിന്റെ അച്ചുതണ്ട് തോറയാണെങ്കിൽ തോറയുടെ അച്ചുതണ്ട് ഈ നാല്പത് ദിവസങ്ങളാണെന്ന് പറയാം. ഈജിപ്തിൽ നിന്ന് രക്ഷപ്പെട്ട് ഇസ്രാഈല്യർ സീനായ് താഴ്‌വരയിലെത്തിയത് മുതൽ ആരംഭിക്കുന്നു ഈ നിയമങ്ങളുടെ ചരിത്രം. തോറയെന്നറിയപ്പെടുന്ന പഴയനിയമബൈബിളിലെ ആദ്യത്തെ അഞ്ചു പുസ്തകങ്ങളിൽ മൂന്നര പുസ്തകങ്ങളിലും വിവരിച്ചിരിക്കുന്നത് ഈ നിയമങ്ങളെക്കുറിച്ചാണ്. ആകെയുള്ള 187 തോറാ അധ്യായങ്ങളിൽ ഏകദേശം അറുപത് ശതമാനം വരും ഈ നിയമങ്ങൾ. അവ ലഭിക്കുന്നതിനും മറ്റുമായി വ്യത്യസ്ത സന്ദർഭങ്ങളിൽ എട്ട് തവണ മോശ സിനായ് മല കയറിയിട്ടുണ്ടെന്നാണ് പുറപ്പാട് പുസ്തകത്തിൽ പറയുന്നത്. ഇതിൽ ആറാമത്തെ തവണയാണ് മോശെയ്ക്ക് കല്‍പലകകളിൽ നിയമങ്ങൾ എഴുതി നൽകിയത് എന്നാണ് ബൈബിളിലുള്ളത്. അതിനായാണ് മോശ നാല്പത് രാപ്പകലുകൾ സിനായ് മലയുടെ മുകളിൽ കഴിഞ്ഞത്. അതേക്കുറിച്ചായിരിക്കണം ഖുർആനിൽ 'മൂസാ നബിക്ക് അല്ലാഹു നിശ്ചയിച്ച നാല്പത് രാത്രികൾ' എന്ന് പറഞ്ഞത്. ഈ നാല്പത് രാത്രികളാണ് ഇസ്രാഈല്യരെ നിയമവാഹകരാക്കിത്തീർത്തത്. ദൈവികനിയമത്തിന്റെ വക്താക്കളെന്ന നിലയിൽ പിൽക്കാലത്ത് അവർക്ക് ലഭിച്ച ആദരവിന്റെയും അംഗീകാരത്തിന്റെയുമെല്ലാം അടിത്തറ ഈ നാല്പത് രാവുകളായിരുന്നു. ഇസ്‌റാഈൽ മക്കളെ സംബന്ധിച്ചിടത്തോളം അതാണ് ഈ രാപ്പകലുകളുടെ പ്രസക്തി.
കല്‍പലകകളിൽ നിയമങ്ങൾ രേഖപ്പെടുത്തി ലഭിച്ച ആറാമത്തെ സിനായ് ആരോഹണത്തെക്കുറിച്ച ബൈബിൾ വിവരണം ഇങ്ങനെയാണ്. "കര്‍ത്താവു മോശയോട് അരുളിച്ചെയ്‌തു: മലമുകളില്‍ എന്റെ സമീപത്തേക്കു കയറിവന്ന്‌ കാത്തുനില്‍ക്കുക. ഞാന്‍ നിയമങ്ങളും കല്പനകളും എഴുതിയ കല്‍പലകകള്‍ നിനക്കു തരാം; നീ അവ ജനത്തെ പഠിപ്പിക്കണം. മോശ തന്റെ സേവകനായ യോശുവയോടുകൂടെ എഴുന്നേറ്റു; മോശ ദൈവത്തിന്റെ മലയിലേക്കു കയറി. അവന്‍ ശ്രേഷ്ഠന്‍മാരോടു പറഞ്ഞു: ഞങ്ങള്‍ മടങ്ങി വരുന്നതുവരെ നിങ്ങള്‍ ഇവിടെ കാത്തുനില്‍ക്കുവിന്‍. അഹറോനും ഹൂറും നിങ്ങളോടുകൂടെയുണ്ടല്ലോ. എന്തെങ്കിലും പ്രശ്‌നമുണ്ടായാല്‍ അവരെ സമീപിക്കുവിന്‍. മോശ മലയിലേക്കു കയറിപ്പോയി. അപ്പോൾ ഒരു മേഘം മലയെ ആവരണം ചെയ്തു. കര്‍ത്താവിന്റെ മഹത്വം സീനായ് മലയില്‍ ആവസിച്ചു. ആറുദിവസത്തേക്ക്‌ ഒരു മേഘം മലയെ മൂടിയിരുന്നു. ഏഴാംദിവസം മേഘത്തില്‍നിന്നു കര്‍ത്താവ്‌ മോശയെ വിളിച്ചു. മലമുകളില്‍ കര്‍ത്താവിന്റെ മഹത്വം ദഹിപ്പിക്കുന്ന അഗ്‌നിക്കു തുല്യം ഇസ്രാഈല്യർക്കു കാണപ്പെട്ടു. മോശ മേഘത്തിന്റെ ഉള്ളില്‍ക്കടന്ന്‌ മലമുകളിലേക്കു കയറി; നാല്‍പതു രാവും നാല്‍പതു പകലും അവന്‍ മലമുകളിലായിരുന്നു." (പുറപ്പാട് 24: 12-18)
ഇക്കാര്യത്തെക്കുറിച്ച് മോശ പറയുന്നതായി ആവർത്തനപുസ്തകം ഉദ്ധരിക്കുന്നത് ഇങ്ങനെയാണ്: "കര്‍ത്താവു നിങ്ങളുമായി നടത്തിയ ഉടമ്പടിയുടെ കല്‍പലകകള്‍ വാങ്ങാനായി മലമുകളില്‍ കയറി, തിന്നുകയോ കുടിക്കുകയോ ചെയ്യാതെ ഞാന്‍ നാല്‍പതു പകലും നാല്‍പതു രാവും അവിടെ ചെലവഴിച്ചു. കര്‍ത്താവു തന്റെ കൈവിരല്‍കൊണ്ട്‌ എഴുതിയ രണ്ടു കല്‍പലകകള്‍ എനിക്കു തന്നു; ജനത്തെയെല്ലാം ഒരുമിച്ചു കൂട്ടിയ ദിവസം മലയില്‍വച്ച്‌ അഗ്‌നിയുടെ മധ്യേനിന്ന്‌ അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു. നാല്‍പതു പകലും നാല്‍പതു രാവും കഴിഞ്ഞപ്പോള്‍ ഉടമ്പടിയുടെ ആ രണ്ടു കല്‍പലകകള്‍ കര്‍ത്താവ്‌ എനിക്കു തന്നു" (ആവർത്തനം 9: 9-11).
നിയമങ്ങൾ എഴുതിയ കല്‍പലകളുമായി സിനായിൽ നിന്ന് താഴെ വന്നപ്പോഴേക്ക് ഇസ്രാഈല്യർ കാളകുട്ടിയുടെ പ്രതിമയുണ്ടാക്കി അതിനെ ആരാധിക്കാനാരംഭിച്ചതായി പുറപ്പാട് പുസ്തകം തന്നെ വിവരിക്കുന്നുണ്ട്. അതിങ്ങനെയാണ്: "മോശ മലയില്‍ നിന്നിറങ്ങിവരാന്‍ താമസിക്കുന്നുവെന്നു കണ്ടപ്പോള്‍, ജനം അഹറോന്റെ ചുറ്റും കൂടി പറഞ്ഞു: ഞങ്ങളെ നയിക്കാന്‍ വേഗം ദേവന്‍മാരെ ഉണ്ടാക്കിത്തരുക. ഞങ്ങളെ ഈജിപ്‌തില്‍നിന്നു കൊണ്ടുവന്ന മോശ എന്ന മനുഷ്യന് എന്തു സംഭവിച്ചുവെന്നു ഞങ്ങള്‍ക്കറിവില്ല. അഹറോന്‍ പറഞ്ഞു: നിങ്ങളുടെ ഭാര്യമാരുടെയും പുത്രന്‍മാരുടെയും പുത്രിമാരുടെയും കാതിലുള്ള സ്വര്‍ണവളയങ്ങള്‍ ഊരിയെടുത്ത്‌ എന്റെ അടുത്തു കൊണ്ടുവരുവിന്‍. ജനം തങ്ങളുടെ കാതുകളില്‍നിന്നു സ്വര്‍ണ വളയങ്ങളൂരി അഹറോന്റെ മുന്‍പില്‍ കൊണ്ടുചെന്നു. അവന്‍ അവ വാങ്ങി മൂശയിലുരുക്കി ഒരു കാളക്കുട്ടിയെ വാര്‍ത്തെടുത്തു. അപ്പോള്‍ അവര്‍ വിളിച്ചുപറഞ്ഞു: ഇസ്രായേലേ, ഇതാ ഈജിപ്‌തില്‍നിന്നു നിന്നെ കൊണ്ടുവന്ന ദേവന്‍മാര്‍. അതു കണ്ടപ്പോള്‍ അഹറോന്‍ കാളക്കുട്ടിയുടെ മുന്‍പില്‍ ഒരു ബലിപീഠം പണിതിട്ട്‌ ഇപ്രകാരം പ്രഖ്യാപിച്ചു: നാളെ കര്‍ത്താവിന്റെ ഉത്‌സവദിനമായിരിക്കും. അവര്‍ പിറ്റേന്ന് അതിരാവിലെ ഉണര്‍ന്ന്‌ ദഹനയാഗങ്ങളും അനുരഞ്‌ജനയാഗങ്ങളും അർപ്പിച്ചു; ജനം തീനും കുടിയും കഴിഞ്ഞ്‌ വിനോദങ്ങളിലേര്‍പ്പെട്ടു. കര്‍ത്താവു മോശയോട് അരുളിച്ചെയ്‌തു: ഉടനെ താഴേക്കുചെല്ലുക. നീ ഈജിപ്‌തില്‍നിന്നു കൂട്ടിക്കൊണ്ടുവന്ന നിന്റെ ജനം തങ്ങളെത്തന്നെ ദുഷിച്ചിരിക്കുന്നു. ഞാന്‍ നിര്‍ദേശിച്ച മാര്‍ഗത്തില്‍നിന്ന്‌ അവര്‍ പെട്ടെന്നു വ്യതിചലിച്ചിരിക്കുന്നു. അവര്‍ ഒരു കാളക്കുട്ടിയെ വാര്‍ത്തെടുത്ത്‌ അതിനെ ആരാധിക്കുകയും അതിനു ബലിയര്‍പ്പിക്കുകയും ചെയ്‌തിരിക്കുന്നു. ഇസ്രായേലേ, നിന്നെ ഈജിപ്‌തില്‍നിന്നു കൊണ്ടുവന്ന ദേവന്‍മാര്‍ ഇതാ എന്ന് അവര്‍ പറഞ്ഞിരിക്കുന്നു........ മോശ കൈകളില്‍ രണ്ട് ഉടമ്പടിപത്രികകളുമായി താഴേക്കിറങ്ങി. പലകകളുടെ ഇരുവശങ്ങളിലും എഴുത്തുണ്ടായിരുന്നു........മോശ പാളയത്തിനടുത്തെത്തിയപ്പോള്‍ കാളക്കുട്ടിയെ കണ്ടു; അവര്‍ നൃത്തം ചെയ്യുന്നതും കണ്ടു; അവന്റെ കോപം ആളിക്കത്തി. അവന്‍ കല്‍പലകകള്‍ വലിച്ചെറിഞ്ഞ്‌ മലയുടെ അടിവാരത്തില്‍ വച്ച്‌ അവ തകര്‍ത്തുകളഞ്ഞു. അവന്‍ കാളക്കുട്ടിയെ എടുത്തു തീയിലിട്ടുചുട്ടു; അത് ഇടിച്ചുപൊടിച്ചു പൊടി വെള്ളത്തില്‍ക്കലക്കി ഇസ്രായേല്‍ ജനത്തെക്കൊണ്ടു കുടിപ്പിച്ചു" (പുറപ്പാട് 32: 1-20)
"അതിന് ശേഷം നിങ്ങൾ ഒരു കാളക്കുട്ടിയെ സ്വീകരിച്ചു; നിങ്ങൾ അക്രമികളുമായിരുന്നു"വെന്ന് ഖുർആൻ പറയുന്നത് ഈ സംഭവത്തെക്കുറിച്ചാണ്. ഈ സംഭവവിവരണത്തിൽ ഗുരുതരമായ ഒരു ആരോപണം ബൈബിൾ ഉന്നയിക്കുന്നുണ്ട്. തങ്ങൾക്ക് ആരാധിക്കാനായി ദേവൻമാരെ വേണമെന്ന് ആവശ്യപ്പെട്ട ഇസ്രാഈല്യർക്ക് സ്വർണം കൊണ്ട് കാളക്കുട്ടിയെ നിർമ്മിച്ച് നൽകിയത് മോശയുടെ സഹോദരനായ അഹറോനാണെന്നാണ് ബൈബിൾ പറയുന്നത് (പുറപ്പാട് 32: 21- 24). പ്രവാചകന്മാരെക്കുറിച്ച ഖുർആനികവീക്ഷണത്തിന് തികച്ചും എതിരാണ് ഈ ആരോപണം. മൂസയോടൊപ്പം നിയോഗിക്കപ്പെട്ട ദൈവദൂതനാണ് ഹാറൂൺ എന്ന് ഖുർആൻ പലവുരു പറയുന്നുണ്ട് (20: 29-30, 23: 45, 28: 34, 35). പാപസുരക്ഷിതരാണ് പ്രവാചകന്മാർ എന്നാണ് ഇസ്‌ലാം പഠിപ്പിക്കുന്നത്. വൻപാപങ്ങളൊന്നും പ്രവാചകന്മാർ ചെയ്യുകയില്ലെന്നും അവർക്ക് സംഭവിച്ചേക്കാവുന്ന ചെറിയ അബദ്ധങ്ങൾ പോലും അല്ലാഹു ഇടപെട്ട് തിരുത്തുമെന്നുമാണ് അവർ പാപസുക്ഷിതരാണ് എന്ന് പറഞ്ഞാൽ അതിനർത്ഥം. സൃഷ്ടിപൂജയാണ് ഏറ്റവും വലിയ പാപമെന്ന് പഠിപ്പിച്ചവരാണ് പ്രവാചകന്മാരെല്ലാം. വിഗ്രഹാരാധനക്ക് പ്രവാചകനായ ഹാറൂൺ കൂട്ടുനിന്നുവെന്ന വാദം ഖുർആനിക ഭൂമികയിൽ അപഗ്രഥനം പോലും അർഹിക്കാത്ത ആരോപണമാണ്. സാമിരിയെന്ന് പേരുള്ള മറ്റൊരാളാണ് ഇത് ചെയ്തതെന്നാണ് ഖുർആൻ വ്യക്തമാക്കുന്നത്. (20: 85) ബൈബിളിലെവിടെയും സാമിരിയെക്കുറിച്ച പരാമർശങ്ങളില്ല. മാനുഷികകരവിരുതുകളാൽ മലിനമാക്കപ്പെട്ട പ്രവാചകകഥനങ്ങളിലെ പതിരുകൾ ഒഴിവാക്കി യഥാർത്ഥ ചരിത്രം മാത്രം പ്രതിപാദിക്കുകയെന്ന ഖുർആനിക ദൗത്യത്തിന്റെ നിർവ്വഹണമാണ് ഇവിടെ നാം കാണുന്നത്. സാമിരിയെക്കുറിച്ച ഖുർആൻ പ്രതിപാദ്യങ്ങളുടെ സത്യതയെക്കുറിച്ച് ആ വിഷയം പ്രതിപാദിക്കുന്ന ആയത്തുകളിലൂടെ കടന്നുപോകുമ്പോൾ നമുക്ക് മനസ്സിലാക്കാം.
തെരെഞ്ഞെടുക്കപ്പെട്ട ഒരു സമൂഹത്തിൽ നിന്ന് ഒരിക്കലും ഉണ്ടാകാൻ പാടില്ലാത്ത പാതകമാണ് ഇസ്രാഈല്യരുടെ പക്കൽ നിന്നുണ്ടായത്. ചെറിയ ഒരു തിന്മയല്ല അത്. സ്രഷ്ടാവിനെ മാത്രം ആരാധിക്കണമെന്ന ദൈവദൂതന്മാരെല്ലാം പഠിപ്പിച്ച അടിസ്ഥാനതത്ത്വത്തെയാണ് തെരെഞ്ഞെടുക്കപ്പെട്ട ജനത വെല്ലുവിളിച്ചിരിക്കുന്നത്. ആ സമൂഹത്തെ മൊത്തമായി നശിപ്പിക്കാൻ പോന്ന മഹാപാപം. എന്നിട്ടും അല്ലാഹു അവർക്ക് അത് പൊറുത്ത് കൊടുത്തു. മോശയുടെ അഭ്യർത്ഥനപ്രകാരമാണ് കർത്താവ് ഇസ്രാഈല്യർക്ക് പൊറുത്തു കൊടുത്തത് എന്നാണ് ബൈബിൾ പറയുന്നത്. ബൈബിൾ വിവരണം നോക്കുക: "കര്‍ത്താവു മോശയോട് അരുളിച്ചെയ്‌തു: ഇവര്‍ ദുശ്‌ശാഠ്യക്കാരായ ഒരു ജനമാണെന്ന്‌ ഞാന്‍ കണ്ടുകഴിഞ്ഞു. അതിനാല്‍, എന്നെ തടയരുത്‌; എന്റെ ക്രോധം ആളിക്കത്തി അവരെ വിഴുങ്ങിക്കളയട്ടെ. എന്നാല്‍, നിന്നില്‍നിന്ന്‌ ഒരു വലിയ ജനതയെ ഞാന്‍ പുറപ്പെടുവിക്കും. മോശ ദൈവമായ കര്‍ത്താവിനോടു കാരുണ്യം യാചിച്ചുകൊണ്ടു പറഞ്ഞു: കര്‍ത്താവേ, വലിയ ശക്‌തിയോടും കരബലത്തോടും കൂടെ അങ്ങുതന്നെ ഈജിപ്‌തില്‍നിന്നു പുറത്തു കൊണ്ടുവന്ന അങ്ങയുടെ ജനത്തിനെതിരേ അവിടുത്തെ ക്രോധം ജ്വലിക്കുന്നതെന്ത്? മലകളില്‍വച്ചു കൊന്നുകളയുന്നതിനും ഭൂമുഖത്തുനിന്നു തുടച്ചുമാറ്റുന്നതിനുമുള്ള ദുരുദ്‌ദേശ്യത്തോടുകൂടിയാണ്‌ അവന്‍ അവരെ കൊണ്ടുപോയത്‌ എന്ന് ഈജിപ്‌തുകാര്‍ പറയാനിടവരുത്തുന്നതെന്തിന്‌? അവിടുത്തെ ഉഗ്രകോപം കൈവെടിയണമേ! അങ്ങയുടെ ജനത്തിനെതിരായുള്ള തീരുമാനത്തില്‍നിന്നു പിന്‍മാറണമേ! അവിടുത്തെ ദാസന്‍മാരായ അബ്രാഹത്തെയും ഇസഹാക്കിനെയും ഇസ്രായേലിനെയും ഓര്‍ക്കണമേ! നിങ്ങളുടെ സന്തതികളെ ആകാശത്തിലെ നക്‌ഷത്രങ്ങളെപ്പോലെ ഞാന്‍ വര്‍ധിപ്പിക്കും, ഞാന്‍ വാഗ്‌ദാനം ചെയ്‌തിട്ടുള്ള ഈ നാടു മുഴുവന്‍ നിങ്ങളുടെ സന്തതികള്‍ക്കു ഞാന്‍ നല്‍കും, അവര്‍ അത് എന്നേക്കും കൈവശമാക്കുകയും ചെയ്യും എന്ന് അവിടുന്നുതന്നെ ശപഥം ചെയ്തു പറഞ്ഞിട്ടുണ്ടല്ലോ. കര്‍ത്താവു ശാന്തനായി. തന്റെ ജനത്തിനെതിരായുള്ള തീരുമാനത്തില്‍നിന്ന്‌ അവിടുന്നു പിന്‍മാറി." (പുറപ്പാട് 32: 9-14)
ഏഴാമത്തെ തവണ മോശ സിനായിലേക്ക് കയറിയത് വിഗ്രഹാരാധന നടത്തുക വഴി മഹാപാപികളായിത്തീർന്ന ഇസ്രാഈല്യരെ നശിപ്പിക്കരുതെന്ന് കർത്താവിനോട് അഭ്യർത്ഥിക്കുവാനും അവർ ചെയ്ത പാപത്തിന് പരിഹാരം ചെയ്യുന്നതിനും വേണ്ടിയായിരുന്നുവെന്നാണ് പുറപ്പാട് പുസ്തകം പറയുന്നത്. (32: 30- 35)
മോശയുടെ എട്ടാമത്തെയും അവസാനത്തേയും സിനായ് യാത്ര ദേഷ്യത്താൽ താൻ എറിഞ്ഞുടച്ച നിയമഫലകങ്ങൾക്ക് പകരം ഫലകങ്ങൾ വാങ്ങാനായിരുന്നുവെന്നാണ് ബൈബിൾ പറയുന്നത്. ഇത്തവണയും നാല്പത് രാപകലുകൾ മോശ സിനായിൽ കഴിഞ്ഞുവെന്നാണ് ബൈബിലിലുള്ളത്. "കര്‍ത്താവു മോശയോട് അരുളിച്ചെയ്‌തു: ആദ്യത്തേതുപോലുള്ള രണ്ടു കല്‍പലകകൾ ചെത്തിയെടുക്കുക. നീ ഉടച്ചുകളഞ്ഞ പലകകളിലുണ്ടായിരുന്ന വാക്കുകള്‍ തന്നെ ഞാന്‍ അതില്‍ എഴുതാം. പ്രഭാതത്തില്‍ത്തന്നെ തയ്യാറായി, സീനായ്‌മലമുകളില്‍ എന്റെ മുന്‍പില്‍ നീ സന്നിഹിതനാകണം. ആരും നിന്നോടൊന്നിച്ചു കയറിവരരുത്‌. മലയിലെങ്ങും ആരും ഉണ്ടായിരിക്കുകയുമരുത്‌. മലയുടെ അടുത്തെങ്ങും ആടുകളോ മാടുകളോ മേയരുത്‌. ആദ്യത്തേതുപോലുളള രണ്ടു കല്‍പലകകൾ മോശ ചെത്തിയെടുത്തു. കര്‍ത്താവു കല്‍പിച്ചതനുസരിച്ച്‌ അവന്‍ അതിരാവിലെ എഴുന്നേറ്റു കല്‍പലകകള്‍ കൈയിലെടുത്ത്‌ സീനായ്‌മലയിലേക്കു കയറിപ്പോയി." (പുറപ്പാട് 34: 1-4)
"മോശ നാല്‍പതു പകലും നാല്‍പതു രാവും കര്‍ത്താവിനോടുകൂടെ അവിടെ ചെലവഴിച്ചു. അവന്‍ ഭക്‌ഷിക്കുകയോ പാനംചെയ്യുകയോ ചെയ്‌തില്ല. ഉടമ്പടിയുടെ വചനങ്ങളായ പത്തു പ്രമാണങ്ങള്‍ അവന്‍ പലകകളില്‍ എഴുതി. രണ്ടു സാക്ഷ്യഫലകങ്ങളും വഹിച്ചുകൊണ്ട്‌ മോശ സീനായ് മലയില്‍നിന്നു താഴേക്കു വന്നു."(പുറപ്പാട് 34: 28, 29)
ഇക്കാര്യം മോശ പറയുന്നതായി ബൈബിൾ ഉദ്ധരിക്കുന്നത് ഇങ്ങനെയാണ്: "കര്‍ത്താവ്‌ എന്നോട്‌ അരുളിച്ചെയ്‌തു: ആദ്യത്തേതുപോലെ രണ്ട് കല്‍പലകകള്‍ വെട്ടിയെടുത്തുകൊണ്ട്‌ മലയുടെ മുകളില്‍ എന്റെയടുത്തു വരുക. മരംകൊണ്ട്‌ ഒരു പേടകവും ഉണ്ടാക്കുക. നീ ഉടച്ചു കളഞ്ഞ ആദ്യത്തെ പലകകളിലുണ്ടായിരുന്ന വാക്കുകള്‍ ഞാന്‍ അവയില്‍ എഴുതും; നീ അവ ആ പേടകത്തില്‍ വെക്കണം. അതനുസരിച്ച്‌ കരുവേലമരംകൊണ്ടു ഞാന്‍ ഒരു പേടകം ഉണ്ടാക്കി, മുന്‍പിലത്തേതുപോലെയുള്ള രണ്ടു കല്‍പലകകളും വെട്ടിയെടുത്തുകൊണ്ട്‌ മലമുകളിലേക്കു പോയി. ജനത്തിന്റെ സമ്മേളനദിവസം നിങ്ങളുടെ ദൈവമായ കര്‍ത്താവ്‌ മലയില്‍വച്ച്‌ അഗ്‌നിയുടെ മധ്യത്തില്‍നിന്നു നിങ്ങളോട്‌ അരുളിച്ചെയ്‌ത പത്തു പ്രമാണങ്ങളും ആദ്യത്തേതുപോലെ ആ പലകകളില്‍ എഴുതി എനിക്കു തന്നു. പിന്നീടു ഞാന്‍ മലയില്‍ നിന്ന് ഇറങ്ങിവന്നു; ഞാനുണ്ടാക്കിയ പേടകത്തില്‍ ആ പലകകള്‍ നിക്‌ഷേപിച്ചു. കര്‍ത്താവ്‌ എന്നോടു കല്‍പിച്ചതുപോലെ അവ അതില്‍ സൂക്‌ഷിച്ചിരിക്കുന്നു." (ആവർത്തനം 10: 1- 5)
ദേഷ്യം പിടിച്ച് അല്ലാഹു നൽകിയ കൽപ്പലകകൾ മൂസാ എറിഞ്ഞതായും പിന്നീട് പെറുക്കിയെടുത്തതായും ഖുർആനിലുമുണ്ട്. ഈ സംഭവം അല്പം വിശദമായി പ്രതിപാദിക്കുന്നത് സൂറത്തുൽ അഅ്റാഫിലാണ്. അതിന്റെ സാരം നമുക്കിങ്ങനെ വായിക്കാം: "മൂസയുടെ ജനം അദ്ദേഹത്തിന് ശേഷം അവരുടെ ആഭരണങ്ങളിൽ നിന്നുള്ള ഒരു കാളക്കുട്ടിയെ സ്വീകരിച്ചു; മുക്രയിടുന്ന ഒരു രൂപം. അതവരോട് സംസാരിക്കുകയോ വഴി കാണിക്കുകയോ ചെയ്യുകയില്ലെന്ന് അവർ കണ്ടില്ലേ? അതിനെ അവർ സ്വീകരിച്ചു; അങ്ങനെ അവർ അക്രമികളാവുകയും ചെയ്തു; അവർക്ക് ഖേദമുണ്ടാവുകയും തങ്ങൾ വഴി പിഴച്ചിരിക്കുന്നുവെന്ന് അവർ കാണുകയും ചെയ്തപ്പോൾ അവർ പറഞ്ഞു: ഞങ്ങളുടെ നാഥൻ ഞങ്ങളോട് കാരുണ്യം കാണിക്കുകയും ഞങ്ങൾക്ക് പൊറുത്ത് തരികയും ചെയ്തിട്ടില്ലെങ്കിൽ ഞങ്ങൾ നഷ്ടക്കാരിൽ പെട്ടുപോകുമെന്നുറപ്പാണ്. കുപിതനും ദുഃഖിതനുമായി തന്റെ ജനത്തിലേക്ക് മടങ്ങിവന്ന മൂസ പറഞ്ഞു: എനിക്ക് ശേഷം നിങ്ങൾ ചെയ്തതെത്ര ചീത്ത?! നിങ്ങളുടെ നാഥന്റെ കാര്യത്തിൽ നിങ്ങൾ ധൃതി കാണിക്കുകയോ? ഫലകങ്ങൾ അദ്ദേഹം താഴെയിട്ടു; തന്റെ സഹോദരന്റെ തല പിടിച്ച് തന്നിലേക്ക് വലിക്കുകയും ചെയ്തു. അവൻ പറഞ്ഞു: 'എന്റെ മാതൃപുത്രാ, ജനം എന്നെ ദുർബലനായി കരുതിയെന്നുറപ്പ്; അവരെന്നെ കൊന്നുകളയുകയും ചെയ്യുമായിരുന്നു. അതിനാൽ എന്നെ നീ ശത്രുക്കൾക്ക് സന്തോഷിക്കുവാനുള്ള കാരണമാക്കിത്തീർക്കരുത്. അക്രമികളായ ജനത്തോടൊപ്പം എന്നെ ഗണിക്കുകയുമരുത്.' അദ്ദേഹം പറഞ്ഞു: 'എന്റെ നാഥാ, എനിക്കും എന്റെ സഹോദരന്നും നീ പൊറുത്തുതരേണമേ; നിന്റെ കാരുണ്യത്തിലേക്ക് നീ ഞങ്ങളെ പ്രവേശിപ്പിക്കേണമേ; കരുണ കാണിക്കുന്നവരിൽ നീ പരമകാരുണികനാണല്ലോ. കാളക്കുട്ടിയെ സ്വീകരിച്ചവരാരോ അവർക്ക് തങ്ങളുടെ നാഥനിൽ നിന്നുള്ള കോപവും, ഐഹികജീവിതത്തില്‍ നിന്ദ്യതയും വന്നുഭവിക്കുന്നതാണ്‌. കള്ളം കെട്ടിച്ചമയ്ക്കുന്നവര്‍ക്കു നാം പ്രതിഫലം നല്‍കുന്നതങ്ങനെയാണ്.
എന്നാല്‍ തിന്‍മകള്‍ ചെയ്ത് പോവുകയും, പിന്നീട് പശ്ചാത്തപിക്കുകയും വിശ്വസിക്കുകയും ചെയ്തവര്‍ക്കു നിന്റെ നാഥൻ അതിന് ശേഷം പൊറുത്തുകൊടുക്കുന്നവനും കരുണ കാണിക്കുന്നവനുമാണ്, തീർച്ച. മൂസയുടെ കോപം അടങ്ങിയപ്പോള്‍ അദ്ദേഹം ഫലകങ്ങൾ എടുത്തു. അവയിലെ ആലേഖനങ്ങളിൽ തങ്ങളുടെ നാഥനെ ഭയക്കുന്നവർക്കുള്ള മാര്‍ഗദര്‍ശനവും കാരുണ്യവുമാണുണ്ടായിരുന്നത്‌." (7:148-154)
ദൈവത്തിന്റെ കൈ കൊണ്ടെഴുതിയ രണ്ട് കല്‍പലകകളാണ് ആദ്യ തവണ മോശയ്ക്ക് കർത്താവ് നൽകിയതെന്ന് പുറപ്പാട് പുസ്തകം പറയുന്നുണ്ട് (31:18). രണ്ടാമത്തെ തവണ നിയമങ്ങൾ എഴുതുന്നതിനായി മോശ വെട്ടിയെടുത്തത് രണ്ട് കല്‍പലകകളായിരുന്നുവെന്ന് ആവർത്തനപുസ്തകത്തിലുമുണ്ട്. (10: 3) ദൈവം നൽകിയതും അത് നശിച്ചപ്പോൾ മോശ നിർമ്മിച്ചതുമെല്ലാം രണ്ട് ഫലകങ്ങളായിരുന്നുവെന്നാണ് ഇതിനർത്ഥം. ഖുർആനിലാകട്ടെ, മൂസാനബിക്ക് നൽകിയ ഫലകങ്ങളുടെ എണ്ണത്തെക്കുറിച്ച കൃത്യമായ പ്രതിപാദനങ്ങളൊന്നുമില്ല. എന്നാൽ രണ്ടിലധികം ഫലകങ്ങളുണ്ടായിരുന്നുവെന്നാണ് ഖുർആൻ നൽകുന്ന സൂചന. ഫലകത്തിന് 'ലൗഹ്' (لَوْحَ) എന്നാണ് പറയുക. 'ലൗഹൈൻ' (لَوْحَیْن) എന്നാണ് അതിന്റെ ദ്വിവചനം; രണ്ട് ഫലകങ്ങൾ എന്നർത്ഥം. ഖുർആനിൽ മൂന്ന് തവണ മൂസാനബിയുടെ ഫലകങ്ങളെക്കുറിച്ച് പ്രതിപാദിക്കുന്നുണ്ട്. ഏഴാം അധ്യായമായ സൂറത്തുൽ അഅ്റാഫിലെ 145, 150, 154 വചനങ്ങളിലാണവ. ഇവയിലെവിടെയും 'ലൗഹൈൻ' എന്ന് പ്രയോഗിച്ചിട്ടില്ല. എല്ലായിടത്തുമുള്ളത് മൂന്നോ അതിലധികമോ ഫലകങ്ങളെക്കുറിക്കുന്ന 'അൽവാഹ്' (أَلْوَاحِ) എന്നാണ്. മൂന്നോ അതിലധികമോ ഫലകങ്ങൾ മൂസാ നബിക്ക് നല്കിയിരുന്നുവെന്നാണ് ഇതിൽ നിന്ന് മനസ്സിലാകുന്നത്.
"മലമുകളിൽ എന്റെ സമീപത്തേക്ക് വന്ന് കാത്തിരിക്കുക; ഞാൻ നിയമങ്ങളും കല്പനകളും എഴുതിയ കല്‍പലകകൾ നിനക്ക് നൽകാം" (പുറപ്പാട് 24: 12) എന്ന് കർത്താവ് മോശയോട് പറഞ്ഞത് പുറപ്പാട് പുസ്തകത്തിലെ 20 മുതൽ 23 വരെ അദ്ധ്യായങ്ങളിൽ തുടർച്ചയായി നിരവധി നിയമങ്ങൾ പറഞ്ഞ ശേഷമാണ്. ഈ മൂന്ന് അധ്യായങ്ങളിലെ നിയമങ്ങൾ മാത്രം എഴുതണമെങ്കിൽ നിരവധി കല്‍പലകകൾ വേണ്ടി വരും. പത്ത് കല്പനകൾ മാത്രമാണ് കല്‍പലകകളിൽ എഴുതിക്കൊടുത്തത് എന്നാണ് ഇതിനുള്ള വിശദീകരണം. (ആവർത്തനം 4: 14). ഇത് ശരിയല്ലെന്ന് ആവർത്തനപുസ്തകം തന്നെ സൂചിപ്പിക്കുന്നുണ്ട്. "കര്‍ത്താവു തന്റെ കൈവിരല്‍കൊണ്ട്‌ എഴുതിയ രണ്ടു കല്‍പലകകള്‍ എനിക്കു തന്നു; ജനത്തെയെല്ലാം ഒരുമിച്ചു കൂട്ടിയ ദിവസം മലയില്‍വച്ച്‌ അഗ്‌നിയുടെ മധ്യേനിന്ന്‌ അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു". (ആവർത്തനം 9:11) ചുരുങ്ങിയത് പുറപ്പാട് പുസ്തകത്തിലെ 20 മുതൽ 23 വരെ അദ്ധ്യായങ്ങളിൽ പ്രതിപാദിക്കപ്പെട്ട നിയമങ്ങളെങ്കിലും കർത്താവ് നൽകിയ ഫലകത്തിലുണ്ടായിരിക്കണമെന്നാണ് 'അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു' എന്ന് പറയുമ്പോൾ അതിനർത്ഥം. അവ മുഴുവനുമായി കേവലം രണ്ട് ഫലകങ്ങളിൽ എഴുതാനാവുകയില്ല. "എല്ലാ കാര്യത്തെയും കുറിച്ച് നാം അദ്ദേഹത്തിന് ഫലകങ്ങളില്‍ എഴുതികൊടുക്കുകയും ചെയ്തു; സദുപദേശവും, എല്ലാറ്റിനെയും കുറിച്ചുള്ള വിശദീകരണവും" (7: 145) എന്നാണ് ഖുർആനും വ്യക്തമാക്കുന്നത്. ബൈബിൾ പറയുന്നത് പോലെ മോശയ്ക്ക് നൽകിയത് രണ്ട് കല്‍പലകകൾ മാത്രമല്ലെന്നും മൂന്നോ അതിലധികമോ ഫലകങ്ങളിലാണ് മൂസാനബിക്ക് നിയമങ്ങൾ രേഖപ്പെടുത്തി നൽകിയതെന്ന ഖുർആനിന്റെ സൂചനയാണ് ശരിയെന്നുമാണ് ഇത് വ്യക്തമാക്കുന്നത്.
ഇസ്രാഈല്യരുടെ വിഗ്രഹാരാധന കണ്ട മൂസ(അ) തന്റെ കയ്യിലുണ്ടായിരുന്ന ഫലകങ്ങൾ വലിച്ചെറിഞ്ഞതായും കോപം അടങ്ങിയ ശേഷം അവ തിരിച്ചെടുത്തതായുമെല്ലാം ഖുർആനിൽ പറയുന്നുണ്ടെങ്കിലും അദ്ദേഹം എറിഞ്ഞപ്പോൾ അവ ഉടഞ്ഞ് നശിച്ചതായോ നിയമഫലകങ്ങൾ ലഭിക്കുന്നതിനായുള്ള രണ്ടാമത്തെ സിനായ് യാത്രയെക്കുറിച്ച പരാമർശങ്ങളൊന്നും അതിലില്ല. കോപിഷ്ഠനായി മൂസാ നബി (അ) ഫലകങ്ങൾ എറിഞ്ഞപ്പോൾ അത് പൊട്ടിയെന്ന് മുഹമ്മദ് നബി (ﷺ) പറഞ്ഞതായി ഇബ്നു അബ്ബാസിൽ നിന്ന് ഇമാമുമാർ അഹ്‌മദും.(1/215 ، ഹദീഥ്:1842) ഹാകിമും.(2/351 ഹദീഥ്: 3250) ത്വബ്റാനിയും (1/12, ഹദീഥ് 25) ഇബ്നു ഹിബ്ബാനും (14/96, ഹദീഥ് 6213)
സ്വഹീഹായ സനദോടെ (ശൈഖ് അൽബാനി: സ്വഹീഹുൽ ജാമിഅ, ഹദീഥ്: 5374) നിവേദനം ചെയ്യുന്നുണ്ട്. ഹദീഥിന്റെ സാരം ഇങ്ങനെയാണ്. "ഇബ്നു അബ്ബാസ് (റ) നിവേദനം, നബി (ﷺ) അരുളി: ഒരാൾ ഒരു വാർത്ത കേൾക്കുന്നത് അയാൾ ആ സംഭവം നേരിട്ട് കാണുന്നത് പോലെയല്ല, അല്ലാഹു മൂസാക്ക് അദ്ദേഹത്തിന്റെ സമുദായം കാളക്കുട്ടിയുടെ വിഗ്രഹമുണ്ടാക്കിയതായുള്ള വിവരം നൽകിയപ്പോൾ അദ്ദേഹം ഫലകങ്ങൾ എറിഞ്ഞില്ല, എന്നാൽ തന്റെ സമുദായം ചെയ്തത് നേരിട്ട് കണ്ടപ്പോൾ അദ്ദേഹം ആ ഫലകങ്ങൾ എറിഞ്ഞു, അവയിൽ പൊട്ടലുകളുണ്ടായി". ഈ ഹദീഥിൽ മൂസാനബി എറിഞ്ഞപ്പോൾ ഫലകങ്ങളിൽ പൊട്ടലുകളുണ്ടായതായല്ലാതെ അത് വഴി അവ നശിച്ചതായോ ലഭിക്കാനായി വീണ്ടും മല കയറിയതായോ പറയുന്നില്ലെന്ന കാര്യം ശ്രദ്ധേയമാണ്. "മൂസയുടെ കോപം അടങ്ങിയപ്പോള്‍ അദ്ദേഹം ഫലകങ്ങൾ എടുത്തു" എന്ന ഖുർആൻ പരാമർശത്തിൽ നിന്ന് കോപം കൊണ്ട് ഫലകങ്ങൾ എറിഞ്ഞപ്പോൾ അവയിൽ പൊട്ടലുകളുണ്ടായിരുന്നിരിക്കാമെങ്കിലും ഉപയോഗശൂന്യമാകുന്ന തരത്തിൽ നശിച്ചിരുന്നില്ലെന്ന വസ്തുത വ്യക്തമാകുന്നുണ്ട്. ഫലകം വാങ്ങാനായുള്ള മോശയുടെ രണ്ടാമത്തെ സിനായ് യാത്രയെപ്പറ്റി ഖുർആനിലോ ഹദീഥുകളിലോ സൂചനകളൊന്നും തന്നെയില്ല. അത്തരമൊരു യാത്രയുണ്ടായിട്ടില്ലെന്നാണ് ഇസ്‌ലാമികപ്രമാണങ്ങളുടെ ഈ നിശബ്ദതയിൽ നിന്ന് മനസ്സിലാകുന്നത്.
ഫലകങ്ങൾ തകർക്കുവാൻ മോശയ്ക്ക് പ്രചോദനമായതെന്താണെന്ന ജൂതവ്യാഖ്യാനം അറിയാൻ ശ്രമിക്കുമ്പോഴാണ് ഇക്കാര്യത്തിലുള്ള ഖുർആനിന്റെയും ഹദീഥുകളുടെയും നിശ്ശബ്ദത എത്രമാത്രം അർത്ഥപൂർണമാണെന്ന് മനസ്സിലാവുക. മോശയുടെ അസാന്നിധ്യത്തിൽ വിഗ്രഹാരാധന നടത്തിയ ഇസ്രാഈല്യരെ ശാപത്തിൽ നിന്നും ശിക്ഷയിൽ നിന്നും രക്ഷപ്പെടുത്താനായി മോശ നടത്തിയ ബോധപൂർവ്വമായ പ്രവർത്തിയാണ് കല്‍പലകകൾ നശിപ്പിച്ച പ്രവർത്തനമെന്നാണ് യഹൂദറബ്ബിമാരുടെ വ്യാഖ്യാനം. തോറാവ്യാഖ്യാനത്തിൽ പ്രസിദ്ധനായ റബ്ബി റാഷിയുടെ മിദ്രാഷിൽ (Rabbi Shlomo Yitzchaki (Rashi): Midrash Tanchuma 3:9:30) നിന്ന് ഇക്കാര്യം മനസ്സിലാക്കാൻ കഴിയും. വിഗ്രഹനിർമ്മാണമോ വിഗ്രഹാരാധനയോ പാടില്ലെന്നും അത് ചെയ്യുന്നവരെ കർത്താവ് വെറുക്കുകയും ശപിക്കുകയും ചെയ്യുമെന്നും പിതാക്കന്മാർ ചെയ്ത പാപത്തിന് മൂന്നും നാലും തലമുറകളിലുള്ളവരെ വരെ ശിക്ഷിക്കുമെന്നുമുള്ള (പുറപ്പാട് 20:1-5) നിയമങ്ങൾ എഴുതിയ ഫലകങ്ങൾ നശിപ്പിച്ചാൽ മാത്രമേ പ്രസ്തുത പാപം ചെയ്ത ഇസ്രാഈല്യരെ രക്ഷിക്കാനും പാപമുക്തരാക്കാനും കഴിയൂവെന്നതുകൊണ്ടാണ് മോശ ബോധപൂർവ്വം ഫലകങ്ങൾ നശിപ്പിച്ചതെന്നാണ് ജൂതറബ്ബിമാർ കരുതുന്നത്. അവ നശിപ്പിച്ചിട്ടില്ലായിരുന്നുവെങ്കിൽ അഹരോൻ അടക്കമുള്ള അന്നത്തെ മുഴുവൻ ജൂതന്മാരും ശപിക്കപ്പെട്ടവരും അവരുടെ അടുത്ത തലമുറകൾ വരെ ശിക്ഷക്ക് അർഹരുമാണെന്ന നിയമം പ്രാബല്യത്തിലാകുമായിരുന്നു. കർത്താവ് നൽകിയ കല്‍പലകകൾ നശിപ്പിക്കുക വഴി മോശ ബോധപൂർവ്വം പാപം ചെയ്ത് ജൂതന്മാരെ രക്ഷിക്കുകയായിരുന്നുവെന്നാണ് വാദം. ഇസ്രാഈല്യർ വിഗ്രഹാരാധനയെന്ന പാപം ചെയ്തിട്ടുണ്ടെങ്കിൽ താനും തോറാഫലകങ്ങൾ നശിപ്പിക്കുകയെന്ന പാപം ചെയ്തിട്ടുണ്ടെന്നും അവരെ ശപിക്കുകയും ശിക്ഷിക്കുകയും ചെയ്യുകയാണെങ്കിൽ അതിനെല്ലാം താനും അർഹനാണെന്നും കർത്താവിനോട് ന്യായവാദം ചെയ്യുന്നതിനും അങ്ങനെ ഇസ്രാഈല്യർക്ക് മാപ്പു നൽകാൻ കർത്താവിനെ നിർബന്ധിക്കുന്നതിനും വേണ്ടിയാണ് മോശ ഫലകങ്ങൾ ഉടച്ചെതെന്നാണ് യഹൂദർ കരുതുന്നതെന്ന് മിദ്രാഷിൽ നിന്ന് മനസ്സിലാവുന്നുണ്ട്.
'തോറ മഹത്തരമാണ്, എന്നാൽ ഒരു ജൂതനാണ് അതിനേക്കാൾ മഹത്തരം' (Torah is great. A Jew is greater) എന്ന സന്ദേശമാണ് നിയമഫലകങ്ങൾ എറിഞ്ഞുടച്ച മോശയുടെ പ്രവർത്തനം വെളിപ്പെടുത്തുന്നതെന്ന അമേരിക്കൻ റബ്ബിയായ നാഫ്ത്തലി സിൽബെർബെർഗിന്റെ അവകാശവാദത്തിൽ നിന്ന് (Rabbi Naftali Silberberg: "Priceless National Treasures" https://www.chabad.org) എത്രത്തോളം വംശീയമായ സന്ദേശമാണ് ഈ എറിഞ്ഞുടക്കലിനെയും വീണ്ടും നിയമം ലഭിക്കാൻ വേണ്ടിയുള്ള എട്ടാം സിനായ് യാത്രയെയും കുറിച്ച ബൈബിൾ വിവരണങ്ങൾ പ്രസരിപ്പിക്കുന്നതെന്ന് മനസ്സിലാക്കാം. ഇസ്‌റാഈൽ മക്കളെ അടിമത്തത്തിൽ നിന്ന് മോചിപ്പിക്കുകയും സത്യത്തിലൂടെ നയിക്കുകയും ചെയ്യുവാനായി നിയോഗിക്കപ്പെട്ട പ്രവാചകനാണ് ഖുർആൻ പരിചയപ്പെടുത്തുന്ന മൂസാനബി (അ). അദ്ദേഹത്തെ ജൂതവംശീയവാദിയാക്കിത്തീർക്കുന്നതിന് വേണ്ടി സൃഷിടിക്കപ്പെട്ട കഥകളെ ഖുർആൻ അംഗീകരിക്കുന്നില്ല. തന്റെ കയ്യിലുണ്ടായിരുന്ന ഫലകങ്ങൾ കോപം മൂലം മൂസാനബി വലിച്ചെറിഞ്ഞുവെന്നത് ശരിയാണ്; അങ്ങനെ അവയിൽ വിള്ളലുകളുണ്ടായി എന്നതും ശരിയാണ്. കോപം അടങ്ങിയ ശേഷം അവ അദ്ദേഹം തിരിച്ചെടുക്കുകയും ചെയ്തിട്ടുണ്ട്. അദ്ദേഹം എറിഞ്ഞപ്പോൾ ഫലകങ്ങൾ ഉപയോഗശൂന്യമാകുന്ന രീതിയിൽ തകർന്നിട്ടില്ല; അതുകൊണ്ട് തന്നെ അത് വീണ്ടും ലഭിക്കാനായി അദ്ദേഹം മല കയറിയിട്ടുമില്ല. എന്നാൽ അവർക്ക് പൊറുത്തുകൊടുക്കുന്നതിനായി മൂസാനബി (അ) അല്ലാഹുവിനോട് പ്രാർത്ഥിച്ചിട്ടുണ്ട്. അല്ലാഹു ആ പ്രാർത്ഥന സ്വീകരിക്കുകയും അവർക്ക് പൊറുത്തുകൊടുക്കുകയും ചെയ്തിട്ടുമുണ്ട്. ഇതാണ് ഖുർആൻ പറയുന്നത്. ബൈബിൾ കഥനങ്ങൾ വംശീയവാദിയാക്കിത്തീർത്ത മഹാനായ ഒരു പ്രവാചകന്റെ ചരിത്രത്തെ എത്ര കൃത്യമായാണ് ഖുർആൻ ശുദ്ധീകരിച്ച് അവതരിപ്പിക്കുന്നത് !! ഖുർആനിൽ ഏറ്റവുമധികം തവണ ആവർത്തിക്കപ്പെട്ട നബികഥനമാണ് മൂസാനബിയുടേത്. ഒരിക്കൽ പോലും അദ്ദേഹം ബോധപൂർവ്വം നിയമഫലകങ്ങൾ എറിഞ്ഞുടച്ച് നശിപ്പിച്ച കഥയോ അത് ലഭിക്കാനായി വീണ്ടും മല കയറിയ കഥയോ ഖുർആൻ പറയുന്നില്ല. ബൈബിൾ കഥകളിൽ നിന്ന് മുഹമ്മദ് നബി (ﷺ) പകർത്തിയതാണ് ഖുർആനിലെ പ്രവാചകകഥനങ്ങൾ എന്ന വിമർശനത്തിന്റെ നട്ടെല്ലൊടിക്കുന്നതാണ് സത്യം മാത്രം അവതരിപ്പിക്കുന്നതിലുള്ള ഖുർആനിന്റെ ഈ സൂക്ഷ്മത. സത്യവും അസത്യവും കൂടിക്കുഴഞ്ഞുകിടക്കുന്ന ബൈബിൾ കഥകൾക്കിടയിൽ നിന്ന് സത്യം മാത്രം അരിച്ചെടുത്ത് അവതരിപ്പിക്കുന്ന ഖുർആനിന്റെ ശൈലി അതിന്റെ ദൈവികത വെളിപ്പെടുത്തുകയും ചെയ്യുന്നു.
ഖുർആൻ ആസ്വാദനം
രണ്ടാം അദ്ധ്യായം
സൂറത്തുൽ ബഖറ
അമ്പത്തിയൊന്ന്, അമ്പത്തിരണ്ട് ആയത്തുകൾ
51. മൂസാക്ക് നാം നാല്പത് രാത്രികൾ നിശ്ചയിച്ച സന്ദർഭവും; എന്നിട്ടും അതിന് ശേഷം നിങ്ങൾ ഒരു കാളക്കുട്ടിയെ സ്വീകരിച്ചു; നിങ്ങൾ അക്രമികളുമായിത്തീർന്നു.
52. പിന്നീട്, അതിന്ന് ശേഷം നാം നിങ്ങൾക്ക് പൊറുത്തുതന്നു; നിങ്ങൾ നന്ദി ചെയ്യുന്നവരാവുന്നതിനായി.
മൂസാ നബിക്ക് അല്ലാഹു നിശ്ചയിച്ച നാല്പത് രാത്രികൾ; ബൈബിളിന്റെ വിവരണത്തിൽ നാല്പത് രാപകലുകൾ; അല്ലാഹു ഇസ്രാഈല്യർക്ക് നൽകിയ മഹാഅനുഗ്രഹങ്ങളിലൊന്നായിരുന്നു തൗറാത്തിലെ നിയമങ്ങൾ നേർക്ക് നേരെ എഴുതി നൽകാൻ വേണ്ടി പടച്ചവൻ നിശ്ചയിച്ച ദിവസങ്ങൾ. ബൈബിൾ പഴയനിയമത്തിന്റെ അച്ചുതണ്ട് തോറയാണെങ്കിൽ തോറയുടെ അച്ചുതണ്ട് ഈ നാല്പത് ദിവസങ്ങളാണെന്ന് പറയാം. ഈജിപ്തിൽ നിന്ന് രക്ഷപ്പെട്ട് ഇസ്രാഈല്യർ സീനായ് താഴ്‌വരയിലെത്തിയത് മുതൽ ആരംഭിക്കുന്നു ഈ നിയമങ്ങളുടെ ചരിത്രം. തോറയെന്നറിയപ്പെടുന്ന പഴയനിയമബൈബിളിലെ ആദ്യത്തെ അഞ്ചു പുസ്തകങ്ങളിൽ മൂന്നര പുസ്തകങ്ങളിലും വിവരിച്ചിരിക്കുന്നത് ഈ നിയമങ്ങളെക്കുറിച്ചാണ്. ആകെയുള്ള 187 തോറാ അധ്യായങ്ങളിൽ ഏകദേശം അറുപത് ശതമാനം വരും ഈ നിയമങ്ങൾ. അവ ലഭിക്കുന്നതിനും മറ്റുമായി വ്യത്യസ്ത സന്ദർഭങ്ങളിൽ എട്ട് തവണ മോശ സിനായ് മല കയറിയിട്ടുണ്ടെന്നാണ് പുറപ്പാട് പുസ്തകത്തിൽ പറയുന്നത്. ഇതിൽ ആറാമത്തെ തവണയാണ് മോശെയ്ക്ക് കല്‍പലകകളിൽ നിയമങ്ങൾ എഴുതി നൽകിയത് എന്നാണ് ബൈബിളിലുള്ളത്. അതിനായാണ് മോശ നാല്പത് രാപ്പകലുകൾ സിനായ് മലയുടെ മുകളിൽ കഴിഞ്ഞത്. അതേക്കുറിച്ചായിരിക്കണം ഖുർആനിൽ 'മൂസാ നബിക്ക് അല്ലാഹു നിശ്ചയിച്ച നാല്പത് രാത്രികൾ' എന്ന് പറഞ്ഞത്. ഈ നാല്പത് രാത്രികളാണ് ഇസ്രാഈല്യരെ നിയമവാഹകരാക്കിത്തീർത്തത്. ദൈവികനിയമത്തിന്റെ വക്താക്കളെന്ന നിലയിൽ പിൽക്കാലത്ത് അവർക്ക് ലഭിച്ച ആദരവിന്റെയും അംഗീകാരത്തിന്റെയുമെല്ലാം അടിത്തറ ഈ നാല്പത് രാവുകളായിരുന്നു. ഇസ്‌റാഈൽ മക്കളെ സംബന്ധിച്ചിടത്തോളം അതാണ് ഈ രാപ്പകലുകളുടെ പ്രസക്തി.
കല്‍പലകകളിൽ നിയമങ്ങൾ രേഖപ്പെടുത്തി ലഭിച്ച ആറാമത്തെ സിനായ് ആരോഹണത്തെക്കുറിച്ച ബൈബിൾ വിവരണം ഇങ്ങനെയാണ്. "കര്‍ത്താവു മോശയോട് അരുളിച്ചെയ്‌തു: മലമുകളില്‍ എന്റെ സമീപത്തേക്കു കയറിവന്ന്‌ കാത്തുനില്‍ക്കുക. ഞാന്‍ നിയമങ്ങളും കല്പനകളും എഴുതിയ കല്‍പലകകള്‍ നിനക്കു തരാം; നീ അവ ജനത്തെ പഠിപ്പിക്കണം. മോശ തന്റെ സേവകനായ യോശുവയോടുകൂടെ എഴുന്നേറ്റു; മോശ ദൈവത്തിന്റെ മലയിലേക്കു കയറി. അവന്‍ ശ്രേഷ്ഠന്‍മാരോടു പറഞ്ഞു: ഞങ്ങള്‍ മടങ്ങി വരുന്നതുവരെ നിങ്ങള്‍ ഇവിടെ കാത്തുനില്‍ക്കുവിന്‍. അഹറോനും ഹൂറും നിങ്ങളോടുകൂടെയുണ്ടല്ലോ. എന്തെങ്കിലും പ്രശ്‌നമുണ്ടായാല്‍ അവരെ സമീപിക്കുവിന്‍. മോശ മലയിലേക്കു കയറിപ്പോയി. അപ്പോൾ ഒരു മേഘം മലയെ ആവരണം ചെയ്തു. കര്‍ത്താവിന്റെ മഹത്വം സീനായ് മലയില്‍ ആവസിച്ചു. ആറുദിവസത്തേക്ക്‌ ഒരു മേഘം മലയെ മൂടിയിരുന്നു. ഏഴാംദിവസം മേഘത്തില്‍നിന്നു കര്‍ത്താവ്‌ മോശയെ വിളിച്ചു. മലമുകളില്‍ കര്‍ത്താവിന്റെ മഹത്വം ദഹിപ്പിക്കുന്ന അഗ്‌നിക്കു തുല്യം ഇസ്രാഈല്യർക്കു കാണപ്പെട്ടു. മോശ മേഘത്തിന്റെ ഉള്ളില്‍ക്കടന്ന്‌ മലമുകളിലേക്കു കയറി; നാല്‍പതു രാവും നാല്‍പതു പകലും അവന്‍ മലമുകളിലായിരുന്നു." (പുറപ്പാട് 24: 12-18)
ഇക്കാര്യത്തെക്കുറിച്ച് മോശ പറയുന്നതായി ആവർത്തനപുസ്തകം ഉദ്ധരിക്കുന്നത് ഇങ്ങനെയാണ്: "കര്‍ത്താവു നിങ്ങളുമായി നടത്തിയ ഉടമ്പടിയുടെ കല്‍പലകകള്‍ വാങ്ങാനായി മലമുകളില്‍ കയറി, തിന്നുകയോ കുടിക്കുകയോ ചെയ്യാതെ ഞാന്‍ നാല്‍പതു പകലും നാല്‍പതു രാവും അവിടെ ചെലവഴിച്ചു. കര്‍ത്താവു തന്റെ കൈവിരല്‍കൊണ്ട്‌ എഴുതിയ രണ്ടു കല്‍പലകകള്‍ എനിക്കു തന്നു; ജനത്തെയെല്ലാം ഒരുമിച്ചു കൂട്ടിയ ദിവസം മലയില്‍വച്ച്‌ അഗ്‌നിയുടെ മധ്യേനിന്ന്‌ അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു. നാല്‍പതു പകലും നാല്‍പതു രാവും കഴിഞ്ഞപ്പോള്‍ ഉടമ്പടിയുടെ ആ രണ്ടു കല്‍പലകകള്‍ കര്‍ത്താവ്‌ എനിക്കു തന്നു" (ആവർത്തനം 9: 9-11).
നിയമങ്ങൾ എഴുതിയ കല്‍പലകളുമായി സിനായിൽ നിന്ന് താഴെ വന്നപ്പോഴേക്ക് ഇസ്രാഈല്യർ കാളകുട്ടിയുടെ പ്രതിമയുണ്ടാക്കി അതിനെ ആരാധിക്കാനാരംഭിച്ചതായി പുറപ്പാട് പുസ്തകം തന്നെ വിവരിക്കുന്നുണ്ട്. അതിങ്ങനെയാണ്: "മോശ മലയില്‍ നിന്നിറങ്ങിവരാന്‍ താമസിക്കുന്നുവെന്നു കണ്ടപ്പോള്‍, ജനം അഹറോന്റെ ചുറ്റും കൂടി പറഞ്ഞു: ഞങ്ങളെ നയിക്കാന്‍ വേഗം ദേവന്‍മാരെ ഉണ്ടാക്കിത്തരുക. ഞങ്ങളെ ഈജിപ്‌തില്‍നിന്നു കൊണ്ടുവന്ന മോശ എന്ന മനുഷ്യന് എന്തു സംഭവിച്ചുവെന്നു ഞങ്ങള്‍ക്കറിവില്ല. അഹറോന്‍ പറഞ്ഞു: നിങ്ങളുടെ ഭാര്യമാരുടെയും പുത്രന്‍മാരുടെയും പുത്രിമാരുടെയും കാതിലുള്ള സ്വര്‍ണവളയങ്ങള്‍ ഊരിയെടുത്ത്‌ എന്റെ അടുത്തു കൊണ്ടുവരുവിന്‍. ജനം തങ്ങളുടെ കാതുകളില്‍നിന്നു സ്വര്‍ണ വളയങ്ങളൂരി അഹറോന്റെ മുന്‍പില്‍ കൊണ്ടുചെന്നു. അവന്‍ അവ വാങ്ങി മൂശയിലുരുക്കി ഒരു കാളക്കുട്ടിയെ വാര്‍ത്തെടുത്തു. അപ്പോള്‍ അവര്‍ വിളിച്ചുപറഞ്ഞു: ഇസ്രായേലേ, ഇതാ ഈജിപ്‌തില്‍നിന്നു നിന്നെ കൊണ്ടുവന്ന ദേവന്‍മാര്‍. അതു കണ്ടപ്പോള്‍ അഹറോന്‍ കാളക്കുട്ടിയുടെ മുന്‍പില്‍ ഒരു ബലിപീഠം പണിതിട്ട്‌ ഇപ്രകാരം പ്രഖ്യാപിച്ചു: നാളെ കര്‍ത്താവിന്റെ ഉത്‌സവദിനമായിരിക്കും. അവര്‍ പിറ്റേന്ന് അതിരാവിലെ ഉണര്‍ന്ന്‌ ദഹനയാഗങ്ങളും അനുരഞ്‌ജനയാഗങ്ങളും അർപ്പിച്ചു; ജനം തീനും കുടിയും കഴിഞ്ഞ്‌ വിനോദങ്ങളിലേര്‍പ്പെട്ടു. കര്‍ത്താവു മോശയോട് അരുളിച്ചെയ്‌തു: ഉടനെ താഴേക്കുചെല്ലുക. നീ ഈജിപ്‌തില്‍നിന്നു കൂട്ടിക്കൊണ്ടുവന്ന നിന്റെ ജനം തങ്ങളെത്തന്നെ ദുഷിച്ചിരിക്കുന്നു. ഞാന്‍ നിര്‍ദേശിച്ച മാര്‍ഗത്തില്‍നിന്ന്‌ അവര്‍ പെട്ടെന്നു വ്യതിചലിച്ചിരിക്കുന്നു. അവര്‍ ഒരു കാളക്കുട്ടിയെ വാര്‍ത്തെടുത്ത്‌ അതിനെ ആരാധിക്കുകയും അതിനു ബലിയര്‍പ്പിക്കുകയും ചെയ്‌തിരിക്കുന്നു. ഇസ്രായേലേ, നിന്നെ ഈജിപ്‌തില്‍നിന്നു കൊണ്ടുവന്ന ദേവന്‍മാര്‍ ഇതാ എന്ന് അവര്‍ പറഞ്ഞിരിക്കുന്നു........ മോശ കൈകളില്‍ രണ്ട് ഉടമ്പടിപത്രികകളുമായി താഴേക്കിറങ്ങി. പലകകളുടെ ഇരുവശങ്ങളിലും എഴുത്തുണ്ടായിരുന്നു........മോശ പാളയത്തിനടുത്തെത്തിയപ്പോള്‍ കാളക്കുട്ടിയെ കണ്ടു; അവര്‍ നൃത്തം ചെയ്യുന്നതും കണ്ടു; അവന്റെ കോപം ആളിക്കത്തി. അവന്‍ കല്‍പലകകള്‍ വലിച്ചെറിഞ്ഞ്‌ മലയുടെ അടിവാരത്തില്‍ വച്ച്‌ അവ തകര്‍ത്തുകളഞ്ഞു. അവന്‍ കാളക്കുട്ടിയെ എടുത്തു തീയിലിട്ടുചുട്ടു; അത് ഇടിച്ചുപൊടിച്ചു പൊടി വെള്ളത്തില്‍ക്കലക്കി ഇസ്രായേല്‍ ജനത്തെക്കൊണ്ടു കുടിപ്പിച്ചു" (പുറപ്പാട് 32: 1-20)
"അതിന് ശേഷം നിങ്ങൾ ഒരു കാളക്കുട്ടിയെ സ്വീകരിച്ചു; നിങ്ങൾ അക്രമികളുമായിരുന്നു"വെന്ന് ഖുർആൻ പറയുന്നത് ഈ സംഭവത്തെക്കുറിച്ചാണ്. ഈ സംഭവവിവരണത്തിൽ ഗുരുതരമായ ഒരു ആരോപണം ബൈബിൾ ഉന്നയിക്കുന്നുണ്ട്. തങ്ങൾക്ക് ആരാധിക്കാനായി ദേവൻമാരെ വേണമെന്ന് ആവശ്യപ്പെട്ട ഇസ്രാഈല്യർക്ക് സ്വർണം കൊണ്ട് കാളക്കുട്ടിയെ നിർമ്മിച്ച് നൽകിയത് മോശയുടെ സഹോദരനായ അഹറോനാണെന്നാണ് ബൈബിൾ പറയുന്നത് (പുറപ്പാട് 32: 21- 24). പ്രവാചകന്മാരെക്കുറിച്ച ഖുർആനികവീക്ഷണത്തിന് തികച്ചും എതിരാണ് ഈ ആരോപണം. മൂസയോടൊപ്പം നിയോഗിക്കപ്പെട്ട ദൈവദൂതനാണ് ഹാറൂൺ എന്ന് ഖുർആൻ പലവുരു പറയുന്നുണ്ട് (20: 29-30, 23: 45, 28: 34, 35). പാപസുരക്ഷിതരാണ് പ്രവാചകന്മാർ എന്നാണ് ഇസ്‌ലാം പഠിപ്പിക്കുന്നത്. വൻപാപങ്ങളൊന്നും പ്രവാചകന്മാർ ചെയ്യുകയില്ലെന്നും അവർക്ക് സംഭവിച്ചേക്കാവുന്ന ചെറിയ അബദ്ധങ്ങൾ പോലും അല്ലാഹു ഇടപെട്ട് തിരുത്തുമെന്നുമാണ് അവർ പാപസുക്ഷിതരാണ് എന്ന് പറഞ്ഞാൽ അതിനർത്ഥം. സൃഷ്ടിപൂജയാണ് ഏറ്റവും വലിയ പാപമെന്ന് പഠിപ്പിച്ചവരാണ് പ്രവാചകന്മാരെല്ലാം. വിഗ്രഹാരാധനക്ക് പ്രവാചകനായ ഹാറൂൺ കൂട്ടുനിന്നുവെന്ന വാദം ഖുർആനിക ഭൂമികയിൽ അപഗ്രഥനം പോലും അർഹിക്കാത്ത ആരോപണമാണ്. സാമിരിയെന്ന് പേരുള്ള മറ്റൊരാളാണ് ഇത് ചെയ്തതെന്നാണ് ഖുർആൻ വ്യക്തമാക്കുന്നത്. (20: 85) ബൈബിളിലെവിടെയും സാമിരിയെക്കുറിച്ച പരാമർശങ്ങളില്ല. മാനുഷികകരവിരുതുകളാൽ മലിനമാക്കപ്പെട്ട പ്രവാചകകഥനങ്ങളിലെ പതിരുകൾ ഒഴിവാക്കി യഥാർത്ഥ ചരിത്രം മാത്രം പ്രതിപാദിക്കുകയെന്ന ഖുർആനിക ദൗത്യത്തിന്റെ നിർവ്വഹണമാണ് ഇവിടെ നാം കാണുന്നത്. സാമിരിയെക്കുറിച്ച ഖുർആൻ പ്രതിപാദ്യങ്ങളുടെ സത്യതയെക്കുറിച്ച് ആ വിഷയം പ്രതിപാദിക്കുന്ന ആയത്തുകളിലൂടെ കടന്നുപോകുമ്പോൾ നമുക്ക് മനസ്സിലാക്കാം.
തെരെഞ്ഞെടുക്കപ്പെട്ട ഒരു സമൂഹത്തിൽ നിന്ന് ഒരിക്കലും ഉണ്ടാകാൻ പാടില്ലാത്ത പാതകമാണ് ഇസ്രാഈല്യരുടെ പക്കൽ നിന്നുണ്ടായത്. ചെറിയ ഒരു തിന്മയല്ല അത്. സ്രഷ്ടാവിനെ മാത്രം ആരാധിക്കണമെന്ന ദൈവദൂതന്മാരെല്ലാം പഠിപ്പിച്ച അടിസ്ഥാനതത്ത്വത്തെയാണ് തെരെഞ്ഞെടുക്കപ്പെട്ട ജനത വെല്ലുവിളിച്ചിരിക്കുന്നത്. ആ സമൂഹത്തെ മൊത്തമായി നശിപ്പിക്കാൻ പോന്ന മഹാപാപം. എന്നിട്ടും അല്ലാഹു അവർക്ക് അത് പൊറുത്ത് കൊടുത്തു. മോശയുടെ അഭ്യർത്ഥനപ്രകാരമാണ് കർത്താവ് ഇസ്രാഈല്യർക്ക് പൊറുത്തു കൊടുത്തത് എന്നാണ് ബൈബിൾ പറയുന്നത്. ബൈബിൾ വിവരണം നോക്കുക: "കര്‍ത്താവു മോശയോട് അരുളിച്ചെയ്‌തു: ഇവര്‍ ദുശ്‌ശാഠ്യക്കാരായ ഒരു ജനമാണെന്ന്‌ ഞാന്‍ കണ്ടുകഴിഞ്ഞു. അതിനാല്‍, എന്നെ തടയരുത്‌; എന്റെ ക്രോധം ആളിക്കത്തി അവരെ വിഴുങ്ങിക്കളയട്ടെ. എന്നാല്‍, നിന്നില്‍നിന്ന്‌ ഒരു വലിയ ജനതയെ ഞാന്‍ പുറപ്പെടുവിക്കും. മോശ ദൈവമായ കര്‍ത്താവിനോടു കാരുണ്യം യാചിച്ചുകൊണ്ടു പറഞ്ഞു: കര്‍ത്താവേ, വലിയ ശക്‌തിയോടും കരബലത്തോടും കൂടെ അങ്ങുതന്നെ ഈജിപ്‌തില്‍നിന്നു പുറത്തു കൊണ്ടുവന്ന അങ്ങയുടെ ജനത്തിനെതിരേ അവിടുത്തെ ക്രോധം ജ്വലിക്കുന്നതെന്ത്? മലകളില്‍വച്ചു കൊന്നുകളയുന്നതിനും ഭൂമുഖത്തുനിന്നു തുടച്ചുമാറ്റുന്നതിനുമുള്ള ദുരുദ്‌ദേശ്യത്തോടുകൂടിയാണ്‌ അവന്‍ അവരെ കൊണ്ടുപോയത്‌ എന്ന് ഈജിപ്‌തുകാര്‍ പറയാനിടവരുത്തുന്നതെന്തിന്‌? അവിടുത്തെ ഉഗ്രകോപം കൈവെടിയണമേ! അങ്ങയുടെ ജനത്തിനെതിരായുള്ള തീരുമാനത്തില്‍നിന്നു പിന്‍മാറണമേ! അവിടുത്തെ ദാസന്‍മാരായ അബ്രാഹത്തെയും ഇസഹാക്കിനെയും ഇസ്രായേലിനെയും ഓര്‍ക്കണമേ! നിങ്ങളുടെ സന്തതികളെ ആകാശത്തിലെ നക്‌ഷത്രങ്ങളെപ്പോലെ ഞാന്‍ വര്‍ധിപ്പിക്കും, ഞാന്‍ വാഗ്‌ദാനം ചെയ്‌തിട്ടുള്ള ഈ നാടു മുഴുവന്‍ നിങ്ങളുടെ സന്തതികള്‍ക്കു ഞാന്‍ നല്‍കും, അവര്‍ അത് എന്നേക്കും കൈവശമാക്കുകയും ചെയ്യും എന്ന് അവിടുന്നുതന്നെ ശപഥം ചെയ്തു പറഞ്ഞിട്ടുണ്ടല്ലോ. കര്‍ത്താവു ശാന്തനായി. തന്റെ ജനത്തിനെതിരായുള്ള തീരുമാനത്തില്‍നിന്ന്‌ അവിടുന്നു പിന്‍മാറി." (പുറപ്പാട് 32: 9-14)
ഏഴാമത്തെ തവണ മോശ സിനായിലേക്ക് കയറിയത് വിഗ്രഹാരാധന നടത്തുക വഴി മഹാപാപികളായിത്തീർന്ന ഇസ്രാഈല്യരെ നശിപ്പിക്കരുതെന്ന് കർത്താവിനോട് അഭ്യർത്ഥിക്കുവാനും അവർ ചെയ്ത പാപത്തിന് പരിഹാരം ചെയ്യുന്നതിനും വേണ്ടിയായിരുന്നുവെന്നാണ് പുറപ്പാട് പുസ്തകം പറയുന്നത്. (32: 30- 35)
മോശയുടെ എട്ടാമത്തെയും അവസാനത്തേയും സിനായ് യാത്ര ദേഷ്യത്താൽ താൻ എറിഞ്ഞുടച്ച നിയമഫലകങ്ങൾക്ക് പകരം ഫലകങ്ങൾ വാങ്ങാനായിരുന്നുവെന്നാണ് ബൈബിൾ പറയുന്നത്. ഇത്തവണയും നാല്പത് രാപകലുകൾ മോശ സിനായിൽ കഴിഞ്ഞുവെന്നാണ് ബൈബിലിലുള്ളത്. "കര്‍ത്താവു മോശയോട് അരുളിച്ചെയ്‌തു: ആദ്യത്തേതുപോലുള്ള രണ്ടു കല്‍പലകകൾ ചെത്തിയെടുക്കുക. നീ ഉടച്ചുകളഞ്ഞ പലകകളിലുണ്ടായിരുന്ന വാക്കുകള്‍ തന്നെ ഞാന്‍ അതില്‍ എഴുതാം. പ്രഭാതത്തില്‍ത്തന്നെ തയ്യാറായി, സീനായ്‌മലമുകളില്‍ എന്റെ മുന്‍പില്‍ നീ സന്നിഹിതനാകണം. ആരും നിന്നോടൊന്നിച്ചു കയറിവരരുത്‌. മലയിലെങ്ങും ആരും ഉണ്ടായിരിക്കുകയുമരുത്‌. മലയുടെ അടുത്തെങ്ങും ആടുകളോ മാടുകളോ മേയരുത്‌. ആദ്യത്തേതുപോലുളള രണ്ടു കല്‍പലകകൾ മോശ ചെത്തിയെടുത്തു. കര്‍ത്താവു കല്‍പിച്ചതനുസരിച്ച്‌ അവന്‍ അതിരാവിലെ എഴുന്നേറ്റു കല്‍പലകകള്‍ കൈയിലെടുത്ത്‌ സീനായ്‌മലയിലേക്കു കയറിപ്പോയി." (പുറപ്പാട് 34: 1-4)
"മോശ നാല്‍പതു പകലും നാല്‍പതു രാവും കര്‍ത്താവിനോടുകൂടെ അവിടെ ചെലവഴിച്ചു. അവന്‍ ഭക്‌ഷിക്കുകയോ പാനംചെയ്യുകയോ ചെയ്‌തില്ല. ഉടമ്പടിയുടെ വചനങ്ങളായ പത്തു പ്രമാണങ്ങള്‍ അവന്‍ പലകകളില്‍ എഴുതി. രണ്ടു സാക്ഷ്യഫലകങ്ങളും വഹിച്ചുകൊണ്ട്‌ മോശ സീനായ് മലയില്‍നിന്നു താഴേക്കു വന്നു."(പുറപ്പാട് 34: 28, 29)
ഇക്കാര്യം മോശ പറയുന്നതായി ബൈബിൾ ഉദ്ധരിക്കുന്നത് ഇങ്ങനെയാണ്: "കര്‍ത്താവ്‌ എന്നോട്‌ അരുളിച്ചെയ്‌തു: ആദ്യത്തേതുപോലെ രണ്ട് കല്‍പലകകള്‍ വെട്ടിയെടുത്തുകൊണ്ട്‌ മലയുടെ മുകളില്‍ എന്റെയടുത്തു വരുക. മരംകൊണ്ട്‌ ഒരു പേടകവും ഉണ്ടാക്കുക. നീ ഉടച്ചു കളഞ്ഞ ആദ്യത്തെ പലകകളിലുണ്ടായിരുന്ന വാക്കുകള്‍ ഞാന്‍ അവയില്‍ എഴുതും; നീ അവ ആ പേടകത്തില്‍ വെക്കണം. അതനുസരിച്ച്‌ കരുവേലമരംകൊണ്ടു ഞാന്‍ ഒരു പേടകം ഉണ്ടാക്കി, മുന്‍പിലത്തേതുപോലെയുള്ള രണ്ടു കല്‍പലകകളും വെട്ടിയെടുത്തുകൊണ്ട്‌ മലമുകളിലേക്കു പോയി. ജനത്തിന്റെ സമ്മേളനദിവസം നിങ്ങളുടെ ദൈവമായ കര്‍ത്താവ്‌ മലയില്‍വച്ച്‌ അഗ്‌നിയുടെ മധ്യത്തില്‍നിന്നു നിങ്ങളോട്‌ അരുളിച്ചെയ്‌ത പത്തു പ്രമാണങ്ങളും ആദ്യത്തേതുപോലെ ആ പലകകളില്‍ എഴുതി എനിക്കു തന്നു. പിന്നീടു ഞാന്‍ മലയില്‍ നിന്ന് ഇറങ്ങിവന്നു; ഞാനുണ്ടാക്കിയ പേടകത്തില്‍ ആ പലകകള്‍ നിക്‌ഷേപിച്ചു. കര്‍ത്താവ്‌ എന്നോടു കല്‍പിച്ചതുപോലെ അവ അതില്‍ സൂക്‌ഷിച്ചിരിക്കുന്നു." (ആവർത്തനം 10: 1- 5)
ദേഷ്യം പിടിച്ച് അല്ലാഹു നൽകിയ കൽപ്പലകകൾ മൂസാ എറിഞ്ഞതായും പിന്നീട് പെറുക്കിയെടുത്തതായും ഖുർആനിലുമുണ്ട്. ഈ സംഭവം അല്പം വിശദമായി പ്രതിപാദിക്കുന്നത് സൂറത്തുൽ അഅ്റാഫിലാണ്. അതിന്റെ സാരം നമുക്കിങ്ങനെ വായിക്കാം: "മൂസയുടെ ജനം അദ്ദേഹത്തിന് ശേഷം അവരുടെ ആഭരണങ്ങളിൽ നിന്നുള്ള ഒരു കാളക്കുട്ടിയെ സ്വീകരിച്ചു; മുക്രയിടുന്ന ഒരു രൂപം. അതവരോട് സംസാരിക്കുകയോ വഴി കാണിക്കുകയോ ചെയ്യുകയില്ലെന്ന് അവർ കണ്ടില്ലേ? അതിനെ അവർ സ്വീകരിച്ചു; അങ്ങനെ അവർ അക്രമികളാവുകയും ചെയ്തു; അവർക്ക് ഖേദമുണ്ടാവുകയും തങ്ങൾ വഴി പിഴച്ചിരിക്കുന്നുവെന്ന് അവർ കാണുകയും ചെയ്തപ്പോൾ അവർ പറഞ്ഞു: ഞങ്ങളുടെ നാഥൻ ഞങ്ങളോട് കാരുണ്യം കാണിക്കുകയും ഞങ്ങൾക്ക് പൊറുത്ത് തരികയും ചെയ്തിട്ടില്ലെങ്കിൽ ഞങ്ങൾ നഷ്ടക്കാരിൽ പെട്ടുപോകുമെന്നുറപ്പാണ്. കുപിതനും ദുഃഖിതനുമായി തന്റെ ജനത്തിലേക്ക് മടങ്ങിവന്ന മൂസ പറഞ്ഞു: എനിക്ക് ശേഷം നിങ്ങൾ ചെയ്തതെത്ര ചീത്ത?! നിങ്ങളുടെ നാഥന്റെ കാര്യത്തിൽ നിങ്ങൾ ധൃതി കാണിക്കുകയോ? ഫലകങ്ങൾ അദ്ദേഹം താഴെയിട്ടു; തന്റെ സഹോദരന്റെ തല പിടിച്ച് തന്നിലേക്ക് വലിക്കുകയും ചെയ്തു. അവൻ പറഞ്ഞു: 'എന്റെ മാതൃപുത്രാ, ജനം എന്നെ ദുർബലനായി കരുതിയെന്നുറപ്പ്; അവരെന്നെ കൊന്നുകളയുകയും ചെയ്യുമായിരുന്നു. അതിനാൽ എന്നെ നീ ശത്രുക്കൾക്ക് സന്തോഷിക്കുവാനുള്ള കാരണമാക്കിത്തീർക്കരുത്. അക്രമികളായ ജനത്തോടൊപ്പം എന്നെ ഗണിക്കുകയുമരുത്.' അദ്ദേഹം പറഞ്ഞു: 'എന്റെ നാഥാ, എനിക്കും എന്റെ സഹോദരന്നും നീ പൊറുത്തുതരേണമേ; നിന്റെ കാരുണ്യത്തിലേക്ക് നീ ഞങ്ങളെ പ്രവേശിപ്പിക്കേണമേ; കരുണ കാണിക്കുന്നവരിൽ നീ പരമകാരുണികനാണല്ലോ. കാളക്കുട്ടിയെ സ്വീകരിച്ചവരാരോ അവർക്ക് തങ്ങളുടെ നാഥനിൽ നിന്നുള്ള കോപവും, ഐഹികജീവിതത്തില്‍ നിന്ദ്യതയും വന്നുഭവിക്കുന്നതാണ്‌. കള്ളം കെട്ടിച്ചമയ്ക്കുന്നവര്‍ക്കു നാം പ്രതിഫലം നല്‍കുന്നതങ്ങനെയാണ്.
എന്നാല്‍ തിന്‍മകള്‍ ചെയ്ത് പോവുകയും, പിന്നീട് പശ്ചാത്തപിക്കുകയും വിശ്വസിക്കുകയും ചെയ്തവര്‍ക്കു നിന്റെ നാഥൻ അതിന് ശേഷം പൊറുത്തുകൊടുക്കുന്നവനും കരുണ കാണിക്കുന്നവനുമാണ്, തീർച്ച. മൂസയുടെ കോപം അടങ്ങിയപ്പോള്‍ അദ്ദേഹം ഫലകങ്ങൾ എടുത്തു. അവയിലെ ആലേഖനങ്ങളിൽ തങ്ങളുടെ നാഥനെ ഭയക്കുന്നവർക്കുള്ള മാര്‍ഗദര്‍ശനവും കാരുണ്യവുമാണുണ്ടായിരുന്നത്‌." (7:148-154)
ദൈവത്തിന്റെ കൈ കൊണ്ടെഴുതിയ രണ്ട് കല്‍പലകകളാണ് ആദ്യ തവണ മോശയ്ക്ക് കർത്താവ് നൽകിയതെന്ന് പുറപ്പാട് പുസ്തകം പറയുന്നുണ്ട് (31:18). രണ്ടാമത്തെ തവണ നിയമങ്ങൾ എഴുതുന്നതിനായി മോശ വെട്ടിയെടുത്തത് രണ്ട് കല്‍പലകകളായിരുന്നുവെന്ന് ആവർത്തനപുസ്തകത്തിലുമുണ്ട്. (10: 3) ദൈവം നൽകിയതും അത് നശിച്ചപ്പോൾ മോശ നിർമ്മിച്ചതുമെല്ലാം രണ്ട് ഫലകങ്ങളായിരുന്നുവെന്നാണ് ഇതിനർത്ഥം. ഖുർആനിലാകട്ടെ, മൂസാനബിക്ക് നൽകിയ ഫലകങ്ങളുടെ എണ്ണത്തെക്കുറിച്ച കൃത്യമായ പ്രതിപാദനങ്ങളൊന്നുമില്ല. എന്നാൽ രണ്ടിലധികം ഫലകങ്ങളുണ്ടായിരുന്നുവെന്നാണ് ഖുർആൻ നൽകുന്ന സൂചന. ഫലകത്തിന് 'ലൗഹ്' (لَوْحَ) എന്നാണ് പറയുക. 'ലൗഹൈൻ' (لَوْحَیْن) എന്നാണ് അതിന്റെ ദ്വിവചനം; രണ്ട് ഫലകങ്ങൾ എന്നർത്ഥം. ഖുർആനിൽ മൂന്ന് തവണ മൂസാനബിയുടെ ഫലകങ്ങളെക്കുറിച്ച് പ്രതിപാദിക്കുന്നുണ്ട്. ഏഴാം അധ്യായമായ സൂറത്തുൽ അഅ്റാഫിലെ 145, 150, 154 വചനങ്ങളിലാണവ. ഇവയിലെവിടെയും 'ലൗഹൈൻ' എന്ന് പ്രയോഗിച്ചിട്ടില്ല. എല്ലായിടത്തുമുള്ളത് മൂന്നോ അതിലധികമോ ഫലകങ്ങളെക്കുറിക്കുന്ന 'അൽവാഹ്' (أَلْوَاحِ) എന്നാണ്. മൂന്നോ അതിലധികമോ ഫലകങ്ങൾ മൂസാ നബിക്ക് നല്കിയിരുന്നുവെന്നാണ് ഇതിൽ നിന്ന് മനസ്സിലാകുന്നത്.
"മലമുകളിൽ എന്റെ സമീപത്തേക്ക് വന്ന് കാത്തിരിക്കുക; ഞാൻ നിയമങ്ങളും കല്പനകളും എഴുതിയ കല്‍പലകകൾ നിനക്ക് നൽകാം" (പുറപ്പാട് 24: 12) എന്ന് കർത്താവ് മോശയോട് പറഞ്ഞത് പുറപ്പാട് പുസ്തകത്തിലെ 20 മുതൽ 23 വരെ അദ്ധ്യായങ്ങളിൽ തുടർച്ചയായി നിരവധി നിയമങ്ങൾ പറഞ്ഞ ശേഷമാണ്. ഈ മൂന്ന് അധ്യായങ്ങളിലെ നിയമങ്ങൾ മാത്രം എഴുതണമെങ്കിൽ നിരവധി കല്‍പലകകൾ വേണ്ടി വരും. പത്ത് കല്പനകൾ മാത്രമാണ് കല്‍പലകകളിൽ എഴുതിക്കൊടുത്തത് എന്നാണ് ഇതിനുള്ള വിശദീകരണം. (ആവർത്തനം 4: 14). ഇത് ശരിയല്ലെന്ന് ആവർത്തനപുസ്തകം തന്നെ സൂചിപ്പിക്കുന്നുണ്ട്. "കര്‍ത്താവു തന്റെ കൈവിരല്‍കൊണ്ട്‌ എഴുതിയ രണ്ടു കല്‍പലകകള്‍ എനിക്കു തന്നു; ജനത്തെയെല്ലാം ഒരുമിച്ചു കൂട്ടിയ ദിവസം മലയില്‍വച്ച്‌ അഗ്‌നിയുടെ മധ്യേനിന്ന്‌ അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു". (ആവർത്തനം 9:11) ചുരുങ്ങിയത് പുറപ്പാട് പുസ്തകത്തിലെ 20 മുതൽ 23 വരെ അദ്ധ്യായങ്ങളിൽ പ്രതിപാദിക്കപ്പെട്ട നിയമങ്ങളെങ്കിലും കർത്താവ് നൽകിയ ഫലകത്തിലുണ്ടായിരിക്കണമെന്നാണ് 'അവിടുന്ന്‌ നിങ്ങളോട്‌ അരുളിച്ചെയ്‌ത സകല വാക്കുകളും അതില്‍ എഴുതപ്പെട്ടിരുന്നു' എന്ന് പറയുമ്പോൾ അതിനർത്ഥം. അവ മുഴുവനുമായി കേവലം രണ്ട് ഫലകങ്ങളിൽ എഴുതാനാവുകയില്ല. "എല്ലാ കാര്യത്തെയും കുറിച്ച് നാം അദ്ദേഹത്തിന് ഫലകങ്ങളില്‍ എഴുതികൊടുക്കുകയും ചെയ്തു; സദുപദേശവും, എല്ലാറ്റിനെയും കുറിച്ചുള്ള വിശദീകരണവും" (7: 145) എന്നാണ് ഖുർആനും വ്യക്തമാക്കുന്നത്. ബൈബിൾ പറയുന്നത് പോലെ മോശയ്ക്ക് നൽകിയത് രണ്ട് കല്‍പലകകൾ മാത്രമല്ലെന്നും മൂന്നോ അതിലധികമോ ഫലകങ്ങളിലാണ് മൂസാനബിക്ക് നിയമങ്ങൾ രേഖപ്പെടുത്തി നൽകിയതെന്ന ഖുർആനിന്റെ സൂചനയാണ് ശരിയെന്നുമാണ് ഇത് വ്യക്തമാക്കുന്നത്.
ഇസ്രാഈല്യരുടെ വിഗ്രഹാരാധന കണ്ട മൂസ(അ) തന്റെ കയ്യിലുണ്ടായിരുന്ന ഫലകങ്ങൾ വലിച്ചെറിഞ്ഞതായും കോപം അടങ്ങിയ ശേഷം അവ തിരിച്ചെടുത്തതായുമെല്ലാം ഖുർആനിൽ പറയുന്നുണ്ടെങ്കിലും അദ്ദേഹം എറിഞ്ഞപ്പോൾ അവ ഉടഞ്ഞ് നശിച്ചതായോ നിയമഫലകങ്ങൾ ലഭിക്കുന്നതിനായുള്ള രണ്ടാമത്തെ സിനായ് യാത്രയെക്കുറിച്ച പരാമർശങ്ങളൊന്നും അതിലില്ല. കോപിഷ്ഠനായി മൂസാ നബി (അ) ഫലകങ്ങൾ എറിഞ്ഞപ്പോൾ അത് പൊട്ടിയെന്ന് മുഹമ്മദ് നബി (ﷺ) പറഞ്ഞതായി ഇബ്നു അബ്ബാസിൽ നിന്ന് ഇമാമുമാർ അഹ്‌മദും.(1/215 ، ഹദീഥ്:1842) ഹാകിമും.(2/351 ഹദീഥ്: 3250) ത്വബ്റാനിയും (1/12, ഹദീഥ് 25) ഇബ്നു ഹിബ്ബാനും (14/96, ഹദീഥ് 6213)
സ്വഹീഹായ സനദോടെ (ശൈഖ് അൽബാനി: സ്വഹീഹുൽ ജാമിഅ, ഹദീഥ്: 5374) നിവേദനം ചെയ്യുന്നുണ്ട്. ഹദീഥിന്റെ സാരം ഇങ്ങനെയാണ്. "ഇബ്നു അബ്ബാസ് (റ) നിവേദനം, നബി (ﷺ) അരുളി: ഒരാൾ ഒരു വാർത്ത കേൾക്കുന്നത് അയാൾ ആ സംഭവം നേരിട്ട് കാണുന്നത് പോലെയല്ല, അല്ലാഹു മൂസാക്ക് അദ്ദേഹത്തിന്റെ സമുദായം കാളക്കുട്ടിയുടെ വിഗ്രഹമുണ്ടാക്കിയതായുള്ള വിവരം നൽകിയപ്പോൾ അദ്ദേഹം ഫലകങ്ങൾ എറിഞ്ഞില്ല, എന്നാൽ തന്റെ സമുദായം ചെയ്തത് നേരിട്ട് കണ്ടപ്പോൾ അദ്ദേഹം ആ ഫലകങ്ങൾ എറിഞ്ഞു, അവയിൽ പൊട്ടലുകളുണ്ടായി". ഈ ഹദീഥിൽ മൂസാനബി എറിഞ്ഞപ്പോൾ ഫലകങ്ങളിൽ പൊട്ടലുകളുണ്ടായതായല്ലാതെ അത് വഴി അവ നശിച്ചതായോ ലഭിക്കാനായി വീണ്ടും മല കയറിയതായോ പറയുന്നില്ലെന്ന കാര്യം ശ്രദ്ധേയമാണ്. "മൂസയുടെ കോപം അടങ്ങിയപ്പോള്‍ അദ്ദേഹം ഫലകങ്ങൾ എടുത്തു" എന്ന ഖുർആൻ പരാമർശത്തിൽ നിന്ന് കോപം കൊണ്ട് ഫലകങ്ങൾ എറിഞ്ഞപ്പോൾ അവയിൽ പൊട്ടലുകളുണ്ടായിരുന്നിരിക്കാമെങ്കിലും ഉപയോഗശൂന്യമാകുന്ന തരത്തിൽ നശിച്ചിരുന്നില്ലെന്ന വസ്തുത വ്യക്തമാകുന്നുണ്ട്. ഫലകം വാങ്ങാനായുള്ള മോശയുടെ രണ്ടാമത്തെ സിനായ് യാത്രയെപ്പറ്റി ഖുർആനിലോ ഹദീഥുകളിലോ സൂചനകളൊന്നും തന്നെയില്ല. അത്തരമൊരു യാത്രയുണ്ടായിട്ടില്ലെന്നാണ് ഇസ്‌ലാമികപ്രമാണങ്ങളുടെ ഈ നിശബ്ദതയിൽ നിന്ന് മനസ്സിലാകുന്നത്.
ഫലകങ്ങൾ തകർക്കുവാൻ മോശയ്ക്ക് പ്രചോദനമായതെന്താണെന്ന ജൂതവ്യാഖ്യാനം അറിയാൻ ശ്രമിക്കുമ്പോഴാണ് ഇക്കാര്യത്തിലുള്ള ഖുർആനിന്റെയും ഹദീഥുകളുടെയും നിശ്ശബ്ദത എത്രമാത്രം അർത്ഥപൂർണമാണെന്ന് മനസ്സിലാവുക. മോശയുടെ അസാന്നിധ്യത്തിൽ വിഗ്രഹാരാധന നടത്തിയ ഇസ്രാഈല്യരെ ശാപത്തിൽ നിന്നും ശിക്ഷയിൽ നിന്നും രക്ഷപ്പെടുത്താനായി മോശ നടത്തിയ ബോധപൂർവ്വമായ പ്രവർത്തിയാണ് കല്‍പലകകൾ നശിപ്പിച്ച പ്രവർത്തനമെന്നാണ് യഹൂദറബ്ബിമാരുടെ വ്യാഖ്യാനം. തോറാവ്യാഖ്യാനത്തിൽ പ്രസിദ്ധനായ റബ്ബി റാഷിയുടെ മിദ്രാഷിൽ (Rabbi Shlomo Yitzchaki (Rashi): Midrash Tanchuma 3:9:30) നിന്ന് ഇക്കാര്യം മനസ്സിലാക്കാൻ കഴിയും. വിഗ്രഹനിർമ്മാണമോ വിഗ്രഹാരാധനയോ പാടില്ലെന്നും അത് ചെയ്യുന്നവരെ കർത്താവ് വെറുക്കുകയും ശപിക്കുകയും ചെയ്യുമെന്നും പിതാക്കന്മാർ ചെയ്ത പാപത്തിന് മൂന്നും നാലും തലമുറകളിലുള്ളവരെ വരെ ശിക്ഷിക്കുമെന്നുമുള്ള (പുറപ്പാട് 20:1-5) നിയമങ്ങൾ എഴുതിയ ഫലകങ്ങൾ നശിപ്പിച്ചാൽ മാത്രമേ പ്രസ്തുത പാപം ചെയ്ത ഇസ്രാഈല്യരെ രക്ഷിക്കാനും പാപമുക്തരാക്കാനും കഴിയൂവെന്നതുകൊണ്ടാണ് മോശ ബോധപൂർവ്വം ഫലകങ്ങൾ നശിപ്പിച്ചതെന്നാണ് ജൂതറബ്ബിമാർ കരുതുന്നത്. അവ നശിപ്പിച്ചിട്ടില്ലായിരുന്നുവെങ്കിൽ അഹരോൻ അടക്കമുള്ള അന്നത്തെ മുഴുവൻ ജൂതന്മാരും ശപിക്കപ്പെട്ടവരും അവരുടെ അടുത്ത തലമുറകൾ വരെ ശിക്ഷക്ക് അർഹരുമാണെന്ന നിയമം പ്രാബല്യത്തിലാകുമായിരുന്നു. കർത്താവ് നൽകിയ കല്‍പലകകൾ നശിപ്പിക്കുക വഴി മോശ ബോധപൂർവ്വം പാപം ചെയ്ത് ജൂതന്മാരെ രക്ഷിക്കുകയായിരുന്നുവെന്നാണ് വാദം. ഇസ്രാഈല്യർ വിഗ്രഹാരാധനയെന്ന പാപം ചെയ്തിട്ടുണ്ടെങ്കിൽ താനും തോറാഫലകങ്ങൾ നശിപ്പിക്കുകയെന്ന പാപം ചെയ്തിട്ടുണ്ടെന്നും അവരെ ശപിക്കുകയും ശിക്ഷിക്കുകയും ചെയ്യുകയാണെങ്കിൽ അതിനെല്ലാം താനും അർഹനാണെന്നും കർത്താവിനോട് ന്യായവാദം ചെയ്യുന്നതിനും അങ്ങനെ ഇസ്രാഈല്യർക്ക് മാപ്പു നൽകാൻ കർത്താവിനെ നിർബന്ധിക്കുന്നതിനും വേണ്ടിയാണ് മോശ ഫലകങ്ങൾ ഉടച്ചെതെന്നാണ് യഹൂദർ കരുതുന്നതെന്ന് മിദ്രാഷിൽ നിന്ന് മനസ്സിലാവുന്നുണ്ട്.
'തോറ മഹത്തരമാണ്, എന്നാൽ ഒരു ജൂതനാണ് അതിനേക്കാൾ മഹത്തരം' (Torah is great. A Jew is greater) എന്ന സന്ദേശമാണ് നിയമഫലകങ്ങൾ എറിഞ്ഞുടച്ച മോശയുടെ പ്രവർത്തനം വെളിപ്പെടുത്തുന്നതെന്ന അമേരിക്കൻ റബ്ബിയായ നാഫ്ത്തലി സിൽബെർബെർഗിന്റെ അവകാശവാദത്തിൽ നിന്ന് (Rabbi Naftali Silberberg: "Priceless National Treasures" https://www.chabad.org) എത്രത്തോളം വംശീയമായ സന്ദേശമാണ് ഈ എറിഞ്ഞുടക്കലിനെയും വീണ്ടും നിയമം ലഭിക്കാൻ വേണ്ടിയുള്ള എട്ടാം സിനായ് യാത്രയെയും കുറിച്ച ബൈബിൾ വിവരണങ്ങൾ പ്രസരിപ്പിക്കുന്നതെന്ന് മനസ്സിലാക്കാം. ഇസ്‌റാഈൽ മക്കളെ അടിമത്തത്തിൽ നിന്ന് മോചിപ്പിക്കുകയും സത്യത്തിലൂടെ നയിക്കുകയും ചെയ്യുവാനായി നിയോഗിക്കപ്പെട്ട പ്രവാചകനാണ് ഖുർആൻ പരിചയപ്പെടുത്തുന്ന മൂസാനബി (അ). അദ്ദേഹത്തെ ജൂതവംശീയവാദിയാക്കിത്തീർക്കുന്നതിന് വേണ്ടി സൃഷിടിക്കപ്പെട്ട കഥകളെ ഖുർആൻ അംഗീകരിക്കുന്നില്ല. തന്റെ കയ്യിലുണ്ടായിരുന്ന ഫലകങ്ങൾ കോപം മൂലം മൂസാനബി വലിച്ചെറിഞ്ഞുവെന്നത് ശരിയാണ്; അങ്ങനെ അവയിൽ വിള്ളലുകളുണ്ടായി എന്നതും ശരിയാണ്. കോപം അടങ്ങിയ ശേഷം അവ അദ്ദേഹം തിരിച്ചെടുക്കുകയും ചെയ്തിട്ടുണ്ട്. അദ്ദേഹം എറിഞ്ഞപ്പോൾ ഫലകങ്ങൾ ഉപയോഗശൂന്യമാകുന്ന രീതിയിൽ തകർന്നിട്ടില്ല; അതുകൊണ്ട് തന്നെ അത് വീണ്ടും ലഭിക്കാനായി അദ്ദേഹം മല കയറിയിട്ടുമില്ല. എന്നാൽ അവർക്ക് പൊറുത്തുകൊടുക്കുന്നതിനായി മൂസാനബി (അ) അല്ലാഹുവിനോട് പ്രാർത്ഥിച്ചിട്ടുണ്ട്. അല്ലാഹു ആ പ്രാർത്ഥന സ്വീകരിക്കുകയും അവർക്ക് പൊറുത്തുകൊടുക്കുകയും ചെയ്തിട്ടുമുണ്ട്. ഇതാണ് ഖുർആൻ പറയുന്നത്. ബൈബിൾ കഥനങ്ങൾ വംശീയവാദിയാക്കിത്തീർത്ത മഹാനായ ഒരു പ്രവാചകന്റെ ചരിത്രത്തെ എത്ര കൃത്യമായാണ് ഖുർആൻ ശുദ്ധീകരിച്ച് അവതരിപ്പിക്കുന്നത് !! ഖുർആനിൽ ഏറ്റവുമധികം തവണ ആവർത്തിക്കപ്പെട്ട നബികഥനമാണ് മൂസാനബിയുടേത്. ഒരിക്കൽ പോലും അദ്ദേഹം ബോധപൂർവ്വം നിയമഫലകങ്ങൾ എറിഞ്ഞുടച്ച് നശിപ്പിച്ച കഥയോ അത് ലഭിക്കാനായി വീണ്ടും മല കയറിയ കഥയോ ഖുർആൻ പറയുന്നില്ല. ബൈബിൾ കഥകളിൽ നിന്ന് മുഹമ്മദ് നബി (ﷺ) പകർത്തിയതാണ് ഖുർആനിലെ പ്രവാചകകഥനങ്ങൾ എന്ന വിമർശനത്തിന്റെ നട്ടെല്ലൊടിക്കുന്നതാണ് സത്യം മാത്രം അവതരിപ്പിക്കുന്നതിലുള്ള ഖുർആനിന്റെ ഈ സൂക്ഷ്മത. സത്യവും അസത്യവും കൂടിക്കുഴഞ്ഞുകിടക്കുന്ന ബൈബിൾ കഥകൾക്കിടയിൽ നിന്ന് സത്യം മാത്രം അരിച്ചെടുത്ത് അവതരിപ്പിക്കുന്ന ഖുർആനിന്റെ ശൈലി അതിന്റെ ദൈവികത വെളിപ്പെടുത്തുകയും ചെയ്യുന്നു.
