സൗന്ദര്യവും ആത്മവിശ്വാസവും

ഡോ. റെനി എംഗൽൻ എഴുതുന്നു:

“കുറച്ച് വർഷങ്ങൾക്ക് മുമ്പ്, എന്റെ വീടിനടുത്തുള്ള ഒരു ചെറിയ ഇറ്റാലിയൻ റെസ്റ്റോറന്റിൽ ഞാൻ അത്താഴം കഴിക്കുകയായിരുന്നു. ഏകദേശം പത്തോളം വരുന്ന ഹൈസ്കൂൾ വിദ്യാർത്ഥികളുടെ ഒരു സംഘം അവിടേക്ക് കയറിവന്നു, എല്ലാവരും അതിമനോഹരമായ വസ്ത്രങ്ങൾ ധരിച്ചിരുന്നു. ആ വർഷത്തെ സമയം വെച്ച് നോക്കുമ്പോൾ, അവരുടെ വാർഷിക ‘ഹോംകമിംഗ് ഡാൻസിന്’ പോകുന്നതിന് മുൻപ് അത്താഴം കഴിക്കാൻ എത്തിയ സംഘമാണെന്ന് ഞാൻ ഊഹിച്ചു. അവർ നടന്നു വന്ന് സീറ്റുകളിൽ ഇരിക്കുന്നത് നോക്കാതിരിക്കാൻ എനിക്ക് കഴിഞ്ഞില്ല. അവർ സുന്ദരികളായിരുന്നു—അതിൽ സംശയമില്ല. പക്ഷേ അവരുടെ വസ്ത്രങ്ങൾ (dresses) വല്ലാതെ നീളം കുറഞ്ഞവയായിരുന്നു.

ആ റെസ്റ്റോറന്റിലെ മേശകൾക്ക് വിരികൾ (tablecloths) ഇല്ലാതിരുന്നതിനാൽ, ഒരിക്കൽ ഇരുന്നു കഴിഞ്ഞാൽ, അര കീഴ്‌പ്പോട്ട് ഒന്നും മറയ്ക്കാൻ കഴിയില്ലായിരുന്നു.
ഈ യുവതികൾക്ക് ശരിക്ക് ഭക്ഷണം കഴിക്കാൻ പോലും കഴിഞ്ഞില്ല, കാരണം വസ്ത്രത്തിന്റെ അറ്റം താഴേക്ക് വലിച്ചുനീക്കാൻ അവർക്ക് നിരന്തരം കൈകൾ ഉപയോഗിക്കേണ്ടി വന്നു.

സ്ട്രാപ്‌ലെസ്സ് (strapless) വസ്ത്രങ്ങൾ ധരിച്ചവർക്ക് ഇരട്ടി ജോലിയായിരുന്നു: താഴെ വസ്ത്രം വലിച്ചു താഴ്ത്തണം, മുകളിൽ വസ്ത്രം വലിച്ചു കയറ്റണം.
ഒരു വായ ഭക്ഷണം കഴിക്കുക. വലിച്ചു താഴ്ത്തുക. വലിച്ചു കയറ്റുക.

നിങ്ങളുടെ ചുറ്റും നടക്കുന്നത് എന്താണെന്ന് ശ്രദ്ധിക്കാൻ പോലും കഴിയാത്ത വിധം വസ്ത്രങ്ങൾ ശരിയാക്കി വെക്കുന്ന തിരക്കിലാകാൻ നിങ്ങൾ സ്ട്രാപ്‌ലെസ്സ് വസ്ത്രമോ അല്ലെങ്കിൽ വല്ലാതെ താഴ്ത്തി വെട്ടിയ വസ്ത്രമോ ധരിക്കണം എന്നില്ല.¹

പെൺകുട്ടികളെ സംബന്ധിച്ചിടത്തോളം, ഈ അനുഭവം ഞെട്ടിക്കുന്ന വിധം ചെറിയ പ്രായത്തിൽ തന്നെ തുടങ്ങുന്നുണ്ട്. മിഷിഗൺ സർവ്വകലാശാലയിലെ ഒരു സോഷ്യോളജിസ്റ്റ് പല പ്രീ-സ്കൂൾ ക്ലാസ് റൂമുകളും നിരീക്ഷിച്ച ശേഷം കുറിച്ചത്, വസ്ത്രങ്ങൾ (dresses) കൊച്ചു പെൺകുട്ടികളുടെ സ്വതന്ത്രമായ ചലനങ്ങളെ വ്യക്തമായും തടസ്സപ്പെടുത്തുന്നു എന്നാണ്.²

ലോയോള യൂണിവേഴ്സിറ്റി ഷിക്കാഗോ നടത്തിയ ഒരു പഠനത്തിൽ പങ്കെടുത്ത 70 ശതമാനത്തിലധികം സ്ത്രീകളും പറഞ്ഞത്, “തങ്ങൾ ഒരു നിശ്ചിത സൗന്ദര്യ സങ്കൽപ്പത്തിന് (beauty ideal) അനുസരിച്ചുള്ള രൂപഭംഗിയുള്ളവരാണെങ്കിൽ മറ്റുള്ളവർ തങ്ങളോട് കുറച്ചുകൂടി നന്നായി പെരുമാറും” എന്നാണ്.³

സൗന്ദര്യമാണ് സന്തോഷത്തിലേക്കുള്ള താക്കോൽ എന്ന് എല്ലാ സാംസ്കാരിക സന്ദേശങ്ങളും നിരന്തരം കളവ് പറഞ്ഞു കൊണ്ടിരിക്കുമ്പോൾ, അത് സ്ത്രീകൾ ആഗ്രഹിക്കുക എന്നത് സ്വഭാവികമാണ്.

ശരീരത്തിന്റെ രൂപഭംഗിയെക്കുറിച്ച് ആകുലപ്പെടുന്നതും ആ ശരീരം ഉപയോഗിച്ച് എന്തെങ്കിലും ക്രിയാത്മായ പ്രവൃത്തി ചെയ്യുന്നതും തമ്മിലുള്ള ബന്ധത്തെക്കുറിച്ച് ‘ജേണൽ ഓഫ് സ്‌പോർട് ആൻഡ് സോഷ്യൽ ഇഷ്യൂസ്’ (Journal of Sport & Social Issues) ഒരു സവിശേഷമായ പഠനം പ്രസിദ്ധീകരിച്ചു:

പത്ത് മുതൽ പതിനേഴ് വയസ്സ് വരെ പ്രായമുള്ള പെൺകുട്ടികൾ ഒരു സോഫ്റ്റ്‌ബോൾ (softball) തങ്ങളാലാവുന്നത്ര വേഗത്തിൽ ഒരു ഭിത്തിയിലേക്ക് എറിയുന്ന ദൃശ്യങ്ങൾ ഗവേഷകർ വീഡിയോയിൽ പകർത്തി.⁴

പ്രായവും പരിശീലനവും നൽകുന്ന സ്വാഭാവികമായ മാറ്റങ്ങൾക്കപ്പുറം, തങ്ങളെത്തന്നെ ഒരു വസ്തുവായി (self-objectification) കാണുന്ന പെൺകുട്ടികളാണ് ഏറ്റവും മോശമായി പന്ത് എറിഞ്ഞതെന്ന് പഠനം കണ്ടെത്തി.

സ്വയം വസ്തുവൽക്കരണം (Self-objectification) എന്നാൽ, വ്യക്തികൾ തങ്ങളുടെ ആന്തരിക അനുഭവങ്ങൾക്കും വികാരങ്ങൾക്കും കഴിവുകൾക്കും മുൻഗണന നൽകുന്നതിന് പകരം, മറ്റുള്ളവർക്ക് കാണാൻ പാകത്തിലുള്ള ഒരു ‘വസ്തു’വായി സ്വന്തം ശരീരത്തെ വിലയിരുത്തുന്ന മനഃശാസ്ത്രപരമായ പ്രതിഭാസമാണിത്. ​ലളിതമായി പറഞ്ഞാൽ, സ്വന്തം ശരീരത്തെ മറ്റൊരു പുറത്തുനിന്നുള്ള വ്യക്തിയുടെ (Outsider’s perspective) കണ്ണിലൂടെ നോക്കിക്കാണുന്ന പ്രക്രിയയാണിത് എന്ന് മനശ്ശാസ്ത്ര പഠനങ്ങൾ വ്യക്തമാക്കുന്നു.⁵

നിങ്ങൾ എങ്ങനെ കാണപ്പെടുന്നു എന്നതിനെക്കുറിച്ച് ചിന്തിച്ചുകൊണ്ടിരിക്കുമ്പോൾ ഒരു പ്രവൃത്തിയിൽ ഏർപ്പെടുക എന്നത് പ്രയാസകരമായ കാര്യമായി മാറുന്നു. സൗന്ദര്യ ചിന്ത ക്രിയാത്മതയെ കുറക്കുകയും, പ്രവർത്തനങ്ങളിൽ ആത്മവിശ്വാസം നശിപ്പിക്കുകയും ചെയ്യുന്നു എന്നർത്ഥം.

‘ഇന്റർനാഷണൽ ജേണൽ ഓഫ് ഈറ്റിംഗ് ഡിസോർഡേഴ്സ്’ (International Journal of Eating Disorders) പ്രസിദ്ധീകരിച്ച ഒരു പഠനം തെളിയിക്കുന്നത്, കോളേജ് വിദ്യാർത്ഥിനികൾ വെറും കുറച്ച് മിനിറ്റുകൾ മാത്രം മാസികകളിലെ (magazines) സൗന്ദര്യ സങ്കൽപ്പങ്ങൾ നിറഞ്ഞ പരസ്യങ്ങൾ കണ്ടപ്പോൾ തന്നെ അവരുടെ ഉള്ളിലെ ശരീരത്തെക്കുറിച്ചുള്ള അപകർഷതാബോധം (body shame) വർദ്ധിച്ചു എന്നാണ്.⁶

ആ പരസ്യങ്ങളിലെ ഉള്ളടക്കം നേരിട്ട് സൗന്ദര്യത്തെക്കുറിച്ചല്ലെങ്കിൽ പോലും അത് സ്ത്രീകളിൽ അപകർഷതാബോധം ഉണ്ടാക്കി. സ്ത്രീകൾ സൗന്ദര്യമാതൃക പോലെ ഒരു സൗന്ദര്യ രൂപം കാണുന്നത് തന്നെ, താൻ അതിൽ നിന്നും എത്രയോ പിന്നിലാണെന്ന് ഒരു സ്ത്രീയെ ഓർമ്മിപ്പിക്കാൻ പര്യാപ്തമാണ്. ഒരു നിമിഷത്തെ നോട്ടം മാത്രം മതി അതിന്.⁷

പെൺകുട്ടികളും സ്ത്രീകളും തങ്ങളുടെ ഓൺലൈൻ ഫോട്ടോകൾ എഡിറ്റ് ചെയ്യാൻ ഫേസ്‌ട്യൂൺ (Facetune) അല്ലെങ്കിൽ പെർഫെക്റ്റ് 365 (Perfect365) പോലുള്ള ആപ്പുകൾ ഉപയോഗിക്കാനുള്ള സാധ്യത ആണുങ്ങളേക്കാൾ കൂടുതലാണ് എന്ന് കണ്ടെത്തുകയുണ്ടായി. പന്ത്രണ്ട് വയസ്സ് മാത്രം പ്രായമുള്ള പെൺകുട്ടികൾ പോലും ചർമ്മം മിനുസപ്പെടുത്താനോ മുഖക്കുരു മറയ്ക്കാനോ മാത്രമല്ല, സ്വന്തം മുഖത്തിന്റെ ആകൃതി മാറ്റാനും കണ്ണുകളുടെയോ മൂക്കിന്റെയോ വലിപ്പം കൂട്ടാനോ കുറയ്ക്കാനോ ഒക്കെയായി ഫോട്ടോ എഡിറ്റിംഗ് സ്ഥിരമായി ഉപയോഗിക്കുന്നതായി റിപ്പോർട്ട് ചെയ്യുന്നു.⁸

2015-ൽ 1,500-ലധികം ബ്രിട്ടീഷ് കൗമാരക്കാരിലും മുതിർന്നവരിലും നടത്തിയ ഒരു സർവേയിൽ, എയർബ്രഷ് ചെയ്ത (airbrushed) ചിത്രങ്ങൾ ശരീരത്തെക്കുറിച്ചുള്ള കാഴ്ചപ്പാടിൽ (body image) ദൂഷ്യഫലങ്ങൾ ഉണ്ടാക്കുന്നു എന്ന കാര്യത്തിൽ പെൺകുട്ടികളും സ്ത്രീകളും വ്യാപകമായി യോജിക്കുന്നതായി കണ്ടെത്തി (74 ശതമാനം പെൺകുട്ടികളും 86 ശതമാനം സ്ത്രീകളും ഇതിനോട് യോജിച്ചു).⁹

തങ്ങളുടെ ആത്മമൂല്യം തങ്ങളുടെ സൗന്ദര്യത്തിലും, രൂപഭംഗിയിലും സങ്കൽപ്പിക്കുന്നത് എത്രത്തോളം കൂടുന്നുവോ, അത്രത്തോളം സ്വന്തം രൂപത്തെക്കുറിച്ച് അവർക്ക് മോശമായ തോന്നൽ ഉണ്ടാവുകയും അവരുടെ ആത്മവിശ്വാസം (self-esteem) കുറയുകയും ചെയ്യുന്നു എന്ന് ബോഡി ഇമേജ് ഗവേഷകനായ തോമസ് ക്യാഷും (Thomas Cash) അദ്ദേഹത്തിന്റെ സഹപ്രവർത്തകരും കണ്ടെത്തി.¹⁰

ചുരുക്കത്തിൽ, മേക്കപ്പും, അൽപ്പവസ്‌ത്രവും, സൗന്ദര്യ ഭ്രമവും സ്ത്രീകളിലെ ആത്മവിശ്വാസവും പ്രവർത്തനക്ഷമതയും കർമ്മ സ്വാതന്ത്ര്യവും കുറക്കുകയാണ് ചെയ്യുന്നത്.

ലിംഗ സമത്വത്തോടും ലൈംഗിക സ്വാതന്ത്രത്തോടും കൂടുതൽ അനുകൂല നിലപാട് വെച്ചു പുലർത്തുന്ന പാശ്ചാത്യൻ നാടുകളിലെ സ്ത്രീകളിൽ പോലും ഇതു തന്നെയാണ് അവസ്ഥ. സൗന്ദര്യബോധം, സ്ത്രീകൾക്ക് കൂടുതൽ കോൺഫിഡൻസ് ഉണ്ടാക്കുന്നു എന്ന വിദണ്ഡ വാദത്തെ നിഷ്‌ഫലമാക്കുന്നതാണ് ഈ പഠനങ്ങൾ.

************

References:

1. Beauty Sick: How the Cultural Obsession with Appearance Hurts Girls and Women: Renee Engeln: Page 77

2. Martin KA. Becoming a gendered body: Practices of preschools. American Sociological Review. August 1998;63(4):494–511.

3. Beauty Sick: How the Cultural Obsession with Appearance Hurts Girls and Women: Renee Engeln: Page 25

4. Fredrickson BL, Harrison K. Throwing like a girl: Self-objectification predicts adolescent girls’ motor performance. Journal of Sport & Social Issues.
2005;29(1):79–101.

5. Fredrickson & Roberts, 1997, Gattino et al., 2023, Behera & Khuntia, 2025 , Rollero & De Piccoli, 2017.

6. Beauty Sick: How the Cultural Obsession with Appearance Hurts Girls and Women: Renee Engeln: Page 88

7. Ibid: 88

8. Chua THH, Chang L. Follow me and like my beautiful selfies: Singapore teenage girls’ engagement in self-presentation and peer comparison on social media. Computers in Human Behavior. 2016;55:190–197.

9. Selimbegović L, Chatard A. Single exposure to disclaimers on airbrushed thin ideal images increases negative thought accessibility. Body Image.
2015;12:1–5.

10. Cash TF, Melnyk SE, Hrabosky JI. The assessment of body image investment: An extensive revision of the Appearance Schemas Inventory.
International Journal of Eating Disorders. 2004;35(3):305–316.