ഉമ്മു അബ്ബാൻ ബിൻത് ഉത്ബതിബ്നു റബീഇ

ഉമ്മു അബ്ബാൻ്റെ ഭർത്താവ് മരണപ്പെട്ടപ്പോൾ ഖലീഫ ഉമർ (റ) അവരെ വിവാഹമന്വേഷിച്ചു. അവർ ആ ആലോചന നിരസിച്ചു. ഇസ്‌ലാമിക സമൂഹത്തിലെ നാലാം ഖലീഫയും പ്രവാചകൻ്റെ പിതാമഹൻ്റെ പുത്രനുമായ അലി (റ) അവരെ വിവാഹമന്വേഷിച്ചു. അവർ ആ ആലോചനയും നിരസിച്ചു. പ്രവാചകൻ്റെ “ഹവാരിയ്യ്” (സന്തതസഹചാരിയായ) സുബൈർ (റ) വിവാഹമന്വേഷിച്ചു. അവർ ആ ആലോചനയും നിരസിച്ചു. അവസാനം അവരുടെ വര സങ്കൽപ്പത്തിന് ഇണങ്ങിയ, സുന്ദരനും സുശീലനുമായ പ്രവാചകാനുചരൻ ത്വൽഹ (റ) അവരെ വിവാഹമന്വേഷിച്ചപ്പോൾ മാത്രം അവർ അംഗീകരിച്ചു.

(മുഖ്തസ്വറു താരീഖി ദിമശ്ക്: ഇബ്നു മൻളൂർ)

പ്രവാചകാനുചരന്മാർക്കിടയിൽ സ്ത്രീകൾക്ക് എത്ര ഉയർന്ന പദവിയും ആദരവും പ്രൗഢിയും പ്രതാപവും ഉണ്ടായിരുന്നു എന്നതിൻ്റെ മകുടോദാഹരമാണ് ഉമ്മു അബ്ബാൻ. സ്ത്രീകൾ പ്രസ്തുത സമൂഹത്തിൽ സ്വതന്ത്രേച്ഛയും വിവേചനാധികാരവും തിരഞ്ഞെടുപ്പ് അവകാശവും എത്രമാത്രം ഉടമപ്പെടുത്തിയിരുന്നു എന്ന് ഉമ്മു അബ്ബാൻ തെളിയിക്കുന്നു.